Aqtóbe oblysynda 126 áleýmettik nysan múgedektigi bar adamdarǵa tolyǵymen beıimdeldi

ASTANA. QazAqparat - Múgedektigi bar adamdardyń zańdy quqyqtaryn qamtamasyz etý maqsatynda Aqtóbe oblysynda 556 áleýmettik ınfraqurylym nysandary beıimdeldi, onyń ishinde 126-sy erekshe qajettilikteri bar adamdardyń barlyq sanattaryna tolyqtaı sáıkestendirildi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.

Budan buryn habarlanǵandaı, elimizde 2025 jylǵa deıin Qazaqstan Respýblıkasynda múgedektigi adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospar, «Amanat» partııasynyń Jol kartasy jáne jáne 2021 jyly Memleket basshysynyń tapsyrmasy boıynsha ázirlengen «Kedergisiz keleshek» jobasy iske asyrylýda.

Joba aıasynda el aýmaǵynda beıimdelýi tıis 22 myń basym nysan anyqtaldy. 2021 jyldan bastap 2025 jylǵa deıin jyl saıyn osyndaı talapqa 4400 nysan saı kelýi qajet. Al bıylǵy jyldyń 1 tamyzdaǵy jaǵdaı boıynsha 10 277 nysan beıimdeldi.

Aqtóbe oblysynda 5 jyl ishinde múgedektigi bar adamdardyń barlyq sanattary úshin 1294 nysandy beıimdeý kózdelgen. Qazirgi ýaqytta 2021-2023 jyldar aralyǵynda beıimdelýge josparlanǵan 776 nysannyń 556-synda jergilikti atqarýshy organdar beıimdeý sharalaryn júrgizdi.

Eńbekmıni Eńbek jáne áleýmettik qorǵaý komıtetiniń Aqtóbe oblysy boıynsha aýmaqtyq departamenti (budan ári – Departament) júrgizgen baqylaýdan keıingi tekserýler barysynda atalǵa 556 nysannyń 126-synyń tolyq beıimdelgeni rastaldy.

Máselen, óńirde múgedektigi bar adamdardyń barlyq sanattaryna qol jetimdi:

- memlekettik mekemeler – 26 (17 ákimdik, 3 oblystyq basqarma, 6 jergilikti atqarýshy organ);

- densaýlyq saqtaý nysandary– 21 (3 emhana, 13 aýrýhana, 3 medıtsınalyq ortalyq, 2 oqý ortalyǵy);

- bilim berý nysandary – 49 (39 mektep, 2 ýnıversıtet, 5 kolledj, 2 gımnazııa, 1 shyǵarmashylyq akademııasy);

- áleýmettik ınfraqurylymnyń ózge de nysandary – 30 (2 poshta bólimshesi, 10 mádenıet úıi, 6 kitaphana, 2 áleýmettik ońaltý ortalyǵy, 5 halyqqa qyzmet kórsetý ortalyǵy, 2 teatr, 1 qonaq úı, 1 áýejaı, 1 temirjol vokzaly, stadıon, sport kesheni jáne t. b);

430 nysan ishinara beıimdelgen dep tanyldy, olar boıynsha 697 buzýshylyq anyqtaldy: estý qabileti buzylǵan adamdar úshin – 218; kórý qabileti buzylǵan adamdar úshin – 223; tirek-qımyl apparaty buzylǵan adamdar úshin – 112, kreslo-arbamen qozǵalatyn adamdar úshin – 144.

Sondaı-aq, 2023 jyldyń sońyna deıin taǵy 220 nysandy beıimdeý josparlanýda.

Memlekettik baqylaý aıasynda Departament áleýmettik ınfraqurylym nysandaryna
16 tekserý júrgizdi, onyń ishinde 13 profılaktıkalyq baqylaý, ótinish negizinde jáne tapsyrmalardyń oryndalýyn baqylaý maqsatynda jospardan tys 3 tekserý.

Tekserýlerdiń qorytyndysy boıynsha anyqtalǵan buzýshylyqtardy joıý týraly
14 uıǵarym berilip, 207 myń teńgege 1 ákimshilik aıyppul salyndy.

Nysandardyń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, joıý týraly nusqamalar ǵana beriletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynady.