Aqtóbe oblysyna jetpegen suıytylǵan gaz kontrabandalyq jolmen shekara asqan
AQTÓBE. QazAqparat - Aqtóbe oblysynda eki apta buryn suıytylǵan gaz tapshylyǵy tirkelgen bolatyn. Arnaıy tekserý toby suıytylǵan gazdyń kontrabandalyq jolmen shekara asyrylǵanyn anyqtady, dep habarlaıdy QazAqparat tilshisi.
Aqtóbedegi suıytylǵan gaz tapshylyǵy máselesi Úkimetke jetip, ótken aptada Energetıka mınıstrligi eki qyzmetkerin óńirge jibergen bolatyn. Oblys ákimi Berdibek Saparbaev prokýratýra da tekserý jumystaryn bastaǵanyn málimdedi. Al búgin «Aqtóbe aqparat» ortalyǵy suıytylǵan gazdy shet elge astyrtyn ótkizýmen aınalysyp kelgen uıymdasqan qylmystyq toptyń ustalǵanyn málimdedi.
«Úkimet pen Aqtóbe oblysy əkimdiginiń tapsyrmasymen oblystyq memlekettik kirister departamentiniń ekonomıkalyq tergeý qyzmeti, QR Bas kólik prokýratýrasy, Ulttyq qaýipsizdik komıteti departamentiniń, oblystyq ІІD men ishki ister jelilik bóliminiń qyzmetkerlerimen jedel -izdestirý jáne tergeý is-sharalaryn júrgizdi. Birlesken is-əreketterdiń nátıjesinde Aqtóbe beketinde ekonomıkalyq kontrabanda jasaǵan, oblys halqynyń ishki paıdalanýyna arnalǵan asa iri kólemdegi suıytylǵan gazdy óńir syrtyna jəne shetelge zańsyz tasymaldap, ótkizýmen aınalysqan uıymdasqan qylmystyq toptyń joly kesildi»,- dep jazylǵan habarlamada.
Aıta keteıik, oblystaǵy gaz jelisi uıymdarynyń aýmaǵynda jedel-izdestirý jáne tergeý is-sharalary, ıaǵnı, tintý, qylmysqa qatysy bar tulǵalardy ustaý operatsııasy júrgizilgen.
