Aqtóbe oblysyna bıznestiń áleýmettik jaýapkershiligi jobalaryn júzege asyrý úshin 50 mlrd teńge tartyldy
ASTANA. QazAqparat - Aqtóbe oblysynda bıyl memlekettik-jeke menshik seriktestik pen bıznestiń áleýmettik jaýapkershiligi aıasynda shamamen 50 mlrd. teńgege jýyq ınvestıtsııa kólemin quraıtyn 125 joba júzege asyrylýda. Bul týraly Ortalyq Kommýnıkatsııalar qyzmetinde ótken baspasóz máslıhatynda oblys ákimi Berdibek Saparbaev málimdedi.
«Memleket basshysy memlekettik-jeke menshik áriptestikti damytýǵa erekshe kóńil bóledi. Bul mehanızm uzaq merzimdi perspektıvaǵa oblystyq bıýdjetke degen júktemeni azaıtyp qana qoımaı, halyqtyń áleýmettik qamsyzdandyrý máselesin jaqsartady. Biz MJÁ belsendi damytýdy jalǵastyrýǵa nıettimiz», - dep atap ótti B.Saparbaev.
Búginde Aqtóbe oblysy bıznestiń áleýmettik jaýapkershiligin jáne memlekettik-jeke menshik seriktestikti damytýda jetekshi orynda tur.
Máselen, Aqtóbede «Qazhrom» TUK» AQ bıznestiń áleýmettik jaýapkershiligi aıasynda 1,5 mlrd. teńgeni quraıtyn balalardy damytýǵa arnalǵan Shyǵarmashylyq akademııasy salyndy.
Sondaı-aq, «CNPC-Aqtóbemunaıgaz» AQ qarajaty esebinen Qazaqstannyń batys aımaǵyndaǵy eń iri ortalyq - Óner ortalyǵy salyndy. Onyń aýmaǵy 13 myń sharshy metrdi quraıdy.
Jergilikti kásipker qalanyń «Batys-2» yqshamaýdanynda Jekpe-jek saraıyn syıǵa tartty. Bul jobaǵa salynǵan ınvestıtsııa kólemi 1,8 mlrd. teńgeni quraıdy. Ámbebap zal túrli sport túrlerinen: boks, kúres, dzıýdodan saıystar ótkizýge múmkindik beredi.
«Sábı» jeke qaıyrymdylyq qorynyń ınvestıtsııalary arqasynda «Meıirim» áleýmettik beıimdelý ortalyǵy salyndy. Qazaqstanda balamasy joq atalmysh keshende búgingi tańda 16-29 jas aralyǵyndaǵy balalar úıiniń toqsannan asa túlegi turady, jumys isteıdi.
MJÁ jobalary arasynda jaqynda paıdalanylýǵa beriletin taǵy bir qundy joba-balalar men eresekterge joǵary mamandandyrylǵan oftalmologııalyq kómek kórsetetin «Darý Jaryǵy» oftalmologııalyq ortalyǵy bar. Joba quny - 3,2 mlrd. teńge.
Jańa neke saraıy jáne tarıhı-ólketaný murajaıy ǵımaratynyń jalpy quny shamamen 2 mlrd teńgeni quraıtyn qurylys jáne jabdyqtaý jumystary aıaqtalýǵa taıaý.
Áleýmettik nysandardy salýǵa bıyl 29 mlrd. teńge kóleminde bıýdjetten tys qarajat tartyldy, al 2017-2019 jj. 69 mlrd teńge tartý josparlanyp otyr.
