Aqtóbe oblysyna 502 mlrd teńge ınvestıtsııa tartylady
AQTÓBE. QazAqparat - Aqtóbe oblysynyń ákimi Berdibek Saparbaev Úkimettiń keńeıtilgen otyrysynda berilgen tapsyrmalardy naqtylady. Bıyl óńir ekonomıkasyndaǵy ósim 5 paıyzdan tómen bolmaýy tıis, dep habarlaıdy QazAqparat tilshisi.
Úkimettiń keńeıtilgen otyrysynan soń óńir basshysy Berdibek Saparbaev memlekettik organdardyń, kásiporyndar men kompanııalardyń, sharýa qojalyqtary men qoǵamdyq uıym basshylarynyń qatysýymen jıyn ótkizdi. Talap boıynsha bıyl óńir ekonomıkasynyń ósimi 5 paıyzdan kem bolmaýy tıis.
«Negizgi mindetterdiń biri - ekonomıka damýynyń qarqynyn báseńdetpeý. Oblys ótken jyldy 5% ósimmen aıaqtaǵan bolatyn, bıyl odan tómen bolmaýy kerek. Ol úshin jumysqa jyldyń basynan bastap belsendi kirisip, memlekettik jáne úkimettik baǵdarlamalardyń tıimdi júzege asyrylýyn qamtamasyz etý qajet»,-dedi Berdibek Saparbaev. Aqtóbe oblystyq ekonomıka jáne bıýdjetti josparlaý basqarmasynyń basshysy Oljas Smaǵulovtyń aıtýynsha, bıyl ónerkásip óniminiń kólemi 2 trıllıon teńgeni quraýy tıis. Bul 2017 jylǵy deńgeıden 448 mıllıard teńgege kóp. Al óńdeý ónerkásibiniń ósimi 526 mıllıardtan 840 mıllıard teńgege jetedi dep kútilýde.
«2015 jyly óńdeý ónerkásibi oblystaǵy barlyq ónerkásiptiń 26 paıyzyn qurasa, bıyl 44% jetpek. Bul ekonomıkanyń ártaraptanýyn bildiredi jáne munaı-gaz sektoryna degen táýeldilikti tómendetý bolyp sanalady. Degenmen, Prezıdent Joldaýyna sáıkes taý-ken metallýrgııalyq jáne munaı-gaz kesheni bizdiń ekonomıkamyz úshin strategııalyq mańyzyn saqtap qalýy tıis»,- dedi Oljas Smaǵulov.
Aqtóbe oblysy boıynsha óndiristegi tehnologııany jańǵyrtý jumystary jalǵasady. Bıyl 25 kásiporyn 38 mıllıard teńge jumsap, óndiriste tsıfrlandyrý jumystaryn júrgizedi. Sonymen qatar, EKSPO-2017 kórmesiniń 18 tehnologııasyn engizedi. Boljam boıynsha bıyl oblys ekonomıkasyna 502 mıllıard teńge ınvestıtsııa tartylady. Bul 2017 jylmen salystyrǵanda 65,4 mıllıard teńgege kóp.
Aqtóbe oblysy ákiminiń baspasóz qyzmetiniń habarlaýynsha, bıyl 870 myń sharshy metr turǵyn úı paıdalanýǵa beriledi. Aqtóbe naryǵyna qazaqstandyq jáne sheteldik qurylys kompanııalary tartylyp, «Nurly jer» jáne «Nurly jol» baǵdarlamalary aıasyndaǵy memlekettik qoldaý kórsetiledi.
«Elbasy Úkimettiń keńeıtilgen otyrysy aıasynda tsıfrlandyrý máselesine erekshe kóńil aýdardy. Jalpy alǵanda, tsıfrlandyrý elementteri ekonomıkanyń barlyq salalarynda, áleýmettik bloktan bastap, ındýstrııaǵa deıin engizilýi kerek», - dep atap ótti óńir basshysy B.Saparbaev.
