Aqtóbe oblysyna 5,8 trln teńge ınvestıtsııa tartylady
«Aqtóbe oblysynyń 2021-2025 jyldarǵa arnalǵan áleýmettik-ekonomıkıkalyq damý keshendi jospary óńirdiń órkendeýine jańa serpin berip, shıkizatqa táýeldilikti tómendetý, sondaı-aq halyqtyń ál-aýqatyn jaqsartý maqsatynda ázirlendi. 5 jyldyń ishinde keshendi jospar jobalaryn iske asyrýǵa barlyǵy 570 mlrd teńgege jýyq qarajat qarastyrylsa, onyń basym bóligi óndiris jáne aýyl sharýashylyǵy kásiporyndarynyń esebinen bolady. Búginde Aqtóbe oblysynyń geografııalyq jaǵynan tıimdi ornalasýy, jer qoınaýynda baı ken oryndarynyń jáne adamı kapıtal áleýetiniń mol bolýy óńirge ınvestorlardyń qyzyǵýshylyǵyn týdyryp otyr. Aqtóbe oblysynyń óndirisi damyǵan iri óńir ekendigin eskere otyra, keshendi josparda jeke ınvestorlar esebinen júzege asyrylatyn birneshe joba kózdelgen. Onyń ishinde túrik ınvestorlarymen iske asyrylyp jatqan, erekshe sharttary bar ındýstrııa aımaǵyn qurý jobasy bar. Jalpy osy joba aıaqtalǵan soń 20 myńnan astam jumys orny qurylyp, 500 mlrd teńge ınvestıtsııa tartylady», - dedi Ońdasyn Orazalın.
Oblys basshysynyń dereginshe, jalpy 2025 jylǵa deıin óńirge 5,8 trln teńgeden astam ınvestıtsııa tartylady. Onyń 1,7 trln teńgesi sheteldik ınvestorlardyń qarajaty bolady.
«Óńirde kóptegen ınfraqurylymdyq jobalar da iske asyrylyp jatyr. Onyń ishinde keshendi josparǵa sáıkes 2025 jylǵa deıin respýblıkalyq bıýdjetten 65 mlrd teńgege jýyq qarajat qoldaý tapty. Buǵan qosa, jergilikti bıýdjetten qosymsha qarjyldandyrý esebinen birneshe avtomobıl jolyn qaıta jańǵyrtý, jeke turǵyn úı qurylysy alańdaryn ınjenerlik-kommýnıkatsııalyq jelilerimen qamtý jobalary iske asyrylady», - dedi óńir ákimi.
