Aqtóbe oblysy Úkimetten qosymsha bıdaı men mal azyǵyn surap otyr
AQTÓBE. QazAqparat – Aqtóbe oblysy boıynsha bıyl astyq túsimi az. Jergilikti ákimdik Úkimetten 190 myń tonna úshinshi surypty bıdaı men 65 myń tonna mal azyǵyn surady, dep habarlaıdy QazAqparat tilshisi.
Aqtóbe oblysy boıynsha egin orý jumystary aıaqtalýǵa jaqyn. Qazirgi kezde jumystyń 76 paıyzǵa jýyǵy támam. Bir qıyny – túsim az, bıdaı jetkiliksiz. Sondyqtan jergilikti ákimdik aldyn ala qamdanyp, Úkimetten bıdaı men mal azyǵyn surady.
«Sharýalar gektarynan 5,7 tsentner astyq jınap jatyr. Barlyǵy 198 myń tonna astyq qambaǵa quıyldy. Aýa raıy jaqsy bolsa, kelesi aptada barlyq jumys aıaqtalady. Áıteke bı, Qarǵaly, Mártók, Hromtaý sekildi eginshiligi jaqsy damyǵan aýdandardyń úlesi basym. Kúnine 9-12 myń gektar alqap shabylyp jatyr. Túsim ótken jyldan az bolyp, úshinshi surypty bıdaı suraldy. Unǵa osy suryp qajet. Halyq nansyz qalady degen qorqynysh bolmaýy kerek. Sonymen qatar, 65 myń tonna jemdik astyq suraldy. Bul azyq qusqa da beriledi», - deıdi Aqtóbe oblystyq aýyl sharýashylyǵy basqarmasy basshysynyń orynbasary Asylhan Abtıev.
