Aqtóbe oblysy Túrkistanǵa teatr salyp beredi
AQTÓBE. QazAqparat - Túrkistan drama teatrynyń qurylysy maýsymda bastalǵan bolatyn, dep habarlaıdy QazAqparat tilshisi.
Aqtóbe oblysynyń ákimi Ońdasyn Orazalın Túrkistanǵa sapary kezinde drama teatr qurylysymen tanysty. Bul - óńirdiń Túrkistanǵa syıy, tartýy.
«Teatr qurylysy Túrkistan men Aqtóbe oblystarynyń birigip qarjylandyrýymen júrip jatyr. 4 qabattan turatyn ǵımarattyń jalpy aýmaǵy - 9700 sharshy metr. Boı kóterip jatqan mádenı oshaq zamanaýı úlgide, barlyq talaptarǵa saı salynyp jatyr. 510 adamǵa arnalǵan kórermen zaly, arnaıy avtoturaq bolady. Ońdasyn Orazalın jaýapty merdiger mekemege drama teatrynyń kópshilik ıgiligine der kezinde berilýin ári qurylysynyń sapaly júrýin tapsyrdy», - dep habarlady oblys ákiminiń baspasóz qyzmeti.
Aıta keteıik, Aqtóbe oblysynyń Túrkistanǵa tartýy keler jyly qoldanysqa beriledi.
