Aqtóbe oblysy Syr eline 300 tonna ónim jetkizdi

QYZYLORDA. QazAqparat - Qazaqstan Respýblıkasy Táýelsizdiginiń 25 jyldyǵy qarsańynda ústimizdegi jyldyń 13-15 qazan kúnderi Qyzylordada Aqtóbe oblysynyń kúnderi bolyp ótti. Aqtóbe oblysy kúnderi barysynda Qyzylorda qalasynyń «Taǵzym» alańynda Aqtóbe oblysynyń aýyl sharýashylyǵy taýar óndirýshileriniń jármeńkesi ótkizildi, dep habarlady QazAqparat oblystyq aýylsharýashylyǵy basqarmasyna silteme jasap.

 
Jármeńkege 12 aýdan men Aqtóbe qalasynan 150-den astam aýyl sharýashylyǵy taýar óndirýshileri men qaıta óńdeý kásiporyndary qatysty.

Aqtóbeden jármeńkege  et (sıyr, qoı, jylqy, túıe, qus, qoıan eti, shujyqtar), sút (shubat, qymyz), un, tary, talqan, qurt, irimshik, kartop kókónister, jemis-jıdekter, baqsha daqyldaryn, bal, jumyrtqa (taýyq, bódene), ósimdik maıy, kondıterlik taǵamdar, konserviler, sýsyndar jáne t.b. 40 júk kóligimen 111,6 mln teńgeniń 300 tonna ónimi ákelinip,  qyzylordalyqtarǵa arzan baǵada satyldy.

Oblystyń qaıta óńdeý kásiporyndary kóptegen ónim túrlerin usyndy.

   

 «Aıs plıýs» JShS, «Molochnye ıstorıı-A» JShS, «Agrofırma Taý» JShS, «Shyńǵys» ShQ, «Qostemir» ShQ, «Qypshaq» ShQ sút ónimderi jáne sýsyndardy, «Ramazan» JShS, «Jańa-Áljan dıirmen kombınaty» JShS jáne «Aqtóbe-nan» JShS, Atameken nan 2000» JShS un, makaron ónimderin, «Aıbek ATK» JShS, «Rokos» JShS shujyq ónimderin tartý etti.

Іs-shara Aqtóbe oblysynyń bıshi, ánshi ártisterimen uıymdastyrylǵan kontserttik baǵdarlamamen ilesip ótkiziledi.

Aıta ketsek, jasalyp jatqan is-sharalar eki oblys arasyndaǵy óńiraralyq kooperatsııany damytý baǵytyndaǵy jumystardyń nátıjesi.

   

Memleket basshysynyń otandyq taýaróndirýshilerdi qoldaý maqsatynda Óńiraralyq kooperatsııany damytý jónindegi tapsyrmasyna sáıkes Qyzylorda jáne Aqtóbe oblystary arasynda aýqymdy is-sharalar bastalyp ketti. Jyl basynan beri oblystar arasynda kelisimder jasalyp, jergilikti taýar óndirýshilerdiń óndirgen ónimderin jan-jaqty usyný maqsatynda tıisti jumystar atqarylyp keledi.

Ústimizdegi jyldyń  naýryz aıynda óńiraralyq saýda-ekonomıkalyq yntymaqtastyqty nyǵaıtý úshin Aqtóbe qalasynda Qyzylorda oblysynyń aýyl sharýashylyǵy jármeńkesi ótkizilip, ónimder Aqtóbe halqyna naryq baǵasynan tómen baǵada satylǵan bolatyn.

Shalqar jáne Yrǵyz aýdanynyń ákimderimen Aral aýdanynyń ákimdigi arasynda aýyl sharýashylyǵy taýarlaryn tikeleı ákelip satý úshin jasalǵan memorandýmǵa sáıkes óńiraralyq taýar almasýdy arttyrý maqsatynda Shalqar aýdanynyń taýar óndirýshileri Aral qalasynda jármeńke ótkizdi. Sondaı-aq, qazirgi tańda Qazaly aýdanynyń kásipkeri Yrǵyzda balyq zaýytynyń qurylysyn bastady.

   

Óńiraralyq kooperatsııa aıasynda Qyzylorda oblysynan Aqtóbe oblysyna áleýmettik mańyzy bar azyq-túlik taýarlaryn tikeleı jetkizý jumystary boıynsha  kúrish, as tuzy, balyq, qarbyz, qaýyn, baqsha daqyldary jáne t.b.  375,5 mln. teńgeniń ónimi jetkizildi.

Sonymen qatar, Qyzylorda oblysy aýyl sharýashylyǵy basqarmasy men «Aqtóbe» áleýmettik-kásipkerlik korporatsııasy arasynda azyq-túlik qaýipsizdigin qamtamasyz etý baǵytynda jasalǵan memorandýmǵa sáıkes Aqtóbe qalasyna 93 tonna aqtalǵan kúrish jetkizildi.

Sondaı-aq, eki oblys arasynda aýyl sharýashylyǵy ónimderimen qatar asyl tuqymdy mal tólderin satyp alýdy jolǵa qoıdy. Eki oblystyń kásiporyndary barlyq salalar boıynsha ózara tıimdi baılanys ornatý jónindegi kelisimderge qol qoıyp, bul baǵytta jumystar júrgizýge naqty qadamdar jasady.

Atap aıtqanda, aýyl sharýashylyǵy salasynda «Ramazan» JShS «Begımbaev» JK-na  (20,0 mln. dana jumyrtqa), «Jantizer» sharýa qojalyǵy «Mıras» saýda úıine (200 tonna et) jáne «Anısan» sharýa qojalyǵy Qyzylorda oblysynyń «Tań» JShS, «Baqytjan» sharýa qojalyǵy 50 bas sút baǵytyndaǵy asyl tuqymdy iri qara malyn jetkizýge memorandýmǵa otyrdy.

Sonymen qatar, Qyzylordadaǵy Aqtóbe oblysy kúnderi aıasynda da birqatar memorandýmǵa qol qoıylyp, óniraralyq baılanys arta túspek.