Aqtóbe oblysy «sary» aımaqqa ótkenimen karantın shekteýi jeńildemeıdi

AQTÓBE. QazAqparat – Aqtóbe oblysy 31 naýryz kúni «qyzyl» aımaqqa kirgen edi, búgin «sary» aımaqqa ótti, dep habarlaıdy QazAqparat tilshisi.

Aqtóbe oblysy boıynsha bir táýlikte taǵy 130 adamnan koronavırýs ınfektsııasy anyqtaldy. Vırýs juqtyrǵandar arasynda 9 oqýshy, 4 muǵalim men 1 medıtsına qyzmetkeri bar.

«Aqtóbe oblysy «sary» aımaqqa ótti. Degenmen saqtyq sharasyn qatań ustanýǵa shaqyramyn. Maska taǵyp, araqashyqtyqty saqtaý qajet. Vaktsına da vırýspen kúres jumystary kezinde mańyzdy ról atqarady. Talap boıynsha «qyzyl» aımaqtan «sary» aımaqqa ótken kezde apta boıy baqylaýǵa múmkindik bar. Sondyqtan karantın shekteýin jeńildetý týraly jańa qaýly 3 mamyr kúni shyǵýy múmkin. Oǵan deıin «qyzyl» aımaqtyń talabyn oryndaımyz», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.

Qazir Aqtóbe oblysy boıynsha 600-den astam adam ınfektsııalyq aýrýhanada em alyp jatyr. Onyń 400-den astamy Aqtóbe qalasynda.

«Naýqastardyń 44-i jansaqtaý bóliminde jatyr. Onyń 14-i ókpeni jasandy jeldetý apparatyna qosylǵan», - dedi oblystyq densaýlyq saqtaý basqarmasy basshysynyń orynbasary Bekbolat Іzbasarov.