Aqtóbe oblysy Reseıden dári-dármektiń 25 túrin satyp aldy
NUR-SULTAN. QazAqparat – Aqtóbe oblysynyń ákimi Ońdasyn Orazalın óńirde qajetti dári-dármektiń 30 kúndik qory qalaı jasaqtalǵanyn aıtyp berdi, dep habarlaıdy QazAqparat tilshisi.
«Qazirgi tańda oblysta indet juqtyrǵandardyń sany – 2753 bolsa, sonyń ishinde ókinishke qaraı toǵyzy qaıtys boldy. Biraq basym kópshiligi emdelip shyqty. Qazir bizde nebary 89 adam emdelýde. Kesheden bastap búginge deıin mysaly 17 jaǵdaı tirkeldi. Bul – 0,6 paıyz. Árıne, bizge pnevmonııa boıynsha salmaq túsip tur. Óńirde 7 773 naýqas tirkelgen. Sonyń 5 myńy emdelip shyqty. Biraq áli de provızorlyq statsıonarda - 1600 naýqas, kúndizgi statsıonarda - myńǵa jýyq adam emdelýde», - dedi Ońdasyn Orazalın Úkimet otyrysynda.
Oblys ákiminiń sózinshe, provızorlyq statsıonarlardyń bári tolyǵymen ottegimen qamtamasyz etilgen.
«Іndetpen kúreske medıtsınalyq qyzmetkerleri barynsha kóptep tarttyq. Olardyń jalpy sany – 2400-den asady. Shilde aıynda ǵana jalpy medıtsınalyq qyzmetkerler 536 mln teńgeniń ústemeaqysyn aldy. Sonymen birge pandemııa ýaqytynda medıtsınalyq ýnıversıtet dárigerlerge úlken septigin tıgizip jatyr. 200-ge tarta rezıdent aýrýhanalardaǵy jumystarǵa tartylǵan», - dedi ol.
Ońdasyn Orazalın sonymen qatar búgingi kúni provızorlyq jáne ınfektsııalyq statsıonarlar «SQ-Farmatsııa» kompanııasymen aptasyna eki ret medıkamenttermen qamtamasyz etiletinin jetkizdi.
«Alaıda jergilikti bıýdjettiń esebinen RF Orynbor oblysynan biz eń qajet 25 túrli 117 myń ımporttyq preparatty satyp aldyq. Osynyń arqasynda oblystaǵy barlyq aýrýhanalar qajetti dári-dármek pen jeke qorǵanys quraldarynyń 30 kúndik qory qalyptasty», - dedi ol.
