Aqtóbe oblysy «qyzyldan» «sary» aımaqqa ótti: Jańa qaýly shyǵa ma
AQTÓBE. QazAqparat – Búgin Aqtóbe oblysy koronavırýs boıynsha ahýaldy baǵalaý matrıtsasynda «qyzyl» aımaqtan «sary» aımaqqa ótti, dep habarlaıdy QazAqparat tilshisi.
Ótken bir táýlikte óńirde 50 jaǵdaı tirkeldi. COVID-19-ǵa shaldyqqandardyń 39-y ınfektsııalyq statsıonarlarǵa jatqyzyldy. Aqtóbe qalasynda – 23 naýqas bolsa, Alǵa, Qobda, Muǵaljar men Temir aýdandarynda da jótelip, dene qyzýy kóterilgender bar.
«Táýlik ishinde bir oqýshy men bir balabaqsha tárbıelenýshisinen koronavırýs ınfektsııasy anyqtaldy. Qazir oblys boıynsha 3700-den astam adam úı karantıninde. Olar eki apta boıy dáriger baqylaýynda bolady. Aýrýshańdyq kórsetkishi boıynsha oblys jeksenbi kúni «qyzyl» aımaqqa ótip, búgin taǵy «sary» aımaqtamyz. Qazirgi kezde oblysta ǵana emes, elimize epıdahýal sát saıyn ózgerip tur. Degenmen Aqtóbede jańa qaýly shyǵarýǵa esh negiz joq. Balalar dástúrli formatta oqýyn jalǵastyrady», - dedi oblystyq sanıtarııalyq-epıdemıologııalyq baqylaý departamenti basshysynyń orynbasary Muhtar Serbaev.
Qazirgi kezde oblystaǵy ınfektsııalyq statsıonarlarda 552 adam em alyp jatyr.
«Jansaqtaý bóliminde 51 naýqas em qabyldaýda. Onyń jeteýi ókpeni jasandy jeldetý apparatyna qosylǵan. Qazirgi kezde barlyǵy 56 bala baqylaýda. Onyń jeteýi statsıonarlyq emde. Al aıaǵy aýyr 47 kelinshektiń 27-i dárigerler baqylaýyna alynyp, statsıonarǵa jatqyzyldy», - dedi oblystyq Densaýlyq saqtaý basqarmasy basshysynyń orynbasary Bekbolat Іzbasarov.
