Aqtóbe oblysy ıgerilmegen bıýdjet qarjysyn kimderge tyqpalaıdy
Komıtettiń esebine sáıkes, aımaqtyń jalpy ónimi artty. Turǵyn úı qurylysy kóbeıip keledi. Áleýmettik mańyzy bar nysandar da kóptep salynýda. Máselen, eki jyldyń ishinde 16 mektep salyndy. Degenmen, oblystyń aınalymdaǵy qarjysy kóp emes. Tabystyń biraz bóligi respýblıkalyq bıýdjetten túsip otyrady. Osy saladaǵy zań buzýshylyqtar da joq emes.
«Mysaly, byltyr Hromtaý aýdandyq ákimdigi bıýdjet qarjysyn ıgeremiz dep, 119,9 mln teńgeni «Inform Stroı Servıs» JShS-na aýdarǵan. Atalǵan kompanııa «Samara-Shymkent» tas jolynan Hromtaýdaǵy Abaı dańǵylyna deıingi joldy jóndeýge kelisken. Alaıda tekseris kezinde 84,1 mln teńgeniń jumystary atqarylmaǵan bolyp shyqty. Sol sııaqty Qobda aýdandyq ákimdigi Taldysaı men Imanǵalı Biltabanov atyndaǵy aýyldarǵa sýmen qamtý júıelerin tartýǵa «KTP» JShS-na 23,7 mln teńge aýdaryp bergen. Biraq eshqandaı jumys jasalmady. Budan bólek, 2016 jyly «Shubarqudyq-Oıyl-Qobda-Sol-Iletsk» tas jolynyń 267-307 shaqyrym aralyǵyndaǵy ýchaskesi qabyldanǵan bolatyn. Merdiger biraz jumysty istemedi. Al jasaǵan jumystary sapasyz. Soǵan qaramastan, oǵan 70,3 mln teńge tólengen», - deıdi Esep komıtetiniń múshesi Rashıt Axmetov.
Ótken jyly Aqtóbe qalasynda týberkýlezge qarsy oblystyq dıspanserdiń qurylysy toqtatylǵan bolatyn. Qazirgi kezde texnıkalyq-ekonomıkalyq negizdemeni jetildirý jumystary júrgizilip jatyr. Degenmen, qurylys basqaramasy «Antares Platinum» JShS-na 1,1 mlrd teńgeni avanspen aýdaryp berdi. Bul aqshaǵa qurylystyń úshten bir bóligin istep tastaýǵa bolady. Biraq kompanııany ony bir jyldan beri óziniń esepshotynda ustap otyr. Esep komıtetiniń tóraǵasy Natalıa Godýnovanyń pikirinshe, Aqtóbe oblysy ıgerilmeı qalatyn bıýdjet qarjysyn qaıtarǵysy kelmeıdi. Sol sebepti ony jan-jaqqa tyqpalap tastaýǵa tyrysady.
Jalpy, aýdıt kezinde 10 nysan tekserildi. Oǵan respýblıkalyq bıýdjetten 37 mlrd teńge bólingen bolatyn. Atalǵan qarjynyń bári 2016-2017 jyldary berildi. «Aýdıttiń nátıjesi boıynsha 468,4 mln teńgeniń tártip buzýshylyqtary anyqtaldy. Oblysta bıýdjettiń 1,1 mlrd teńgesi tıimsiz jumsalǵan», - dep atap kórsetti R.Axmetov.
