Aqtóbe oblysy dala órtinen zardap shegýde
ASTANA. Shildeniń 12-si. QazAqparat - Ótken táýlikte Aqtóbe oblysynda 5 dala órti sóndirildi, dep habarlady QR Tótenshe jaǵdaılar mınıstrliginiń baspasóz qyzmetinen.
Órttiń eń irisi Áıteke bı aýdanyna qarasty Jabasaq aýyldyq okrýgi aýmaǵynda oryn alǵan. Eki kúnge sozylǵan tilsiz jaý 1,2 myń gektar alqapty qamtyǵan. Jeksenbi kúni tańerteń ǵana sóndirilgen órttiń aldyn alýǵa QR TJM-niń Aqtóbe oblystyq tótenshe jaǵdaılar departamenti órt sóndirý qyzmetiniń jeke quramyndaǵy 7 maman men 1 tehnıka jáne qatarynda 15 adam men 3 tehnıka bar erikti órt sóndirýshiler tartyldy.
Temir aýdanynda jalpy aýmaǵy 150 gektardy quraıtyn eki jer telimi órt qushaǵyna orandy. Qyzyl jalyn tili Alǵa aýdanynyń Pavlovka aýyldyq okrýginiń aýmaǵyn da qamtyǵan.
Sondaı-aq Áıteke bı aýdanyna qarasty Áıke aýyldyq okrýginiń 400 gektar dalasy órtendi.
Qutqarýshylardyń atap ótýinshe, barlyq oqıǵalarda da qaza tapqandar men zardap shekkender joq.
