Aqtóbe oblysy:Aýylda pedagogtar, dárigerler men agrarııa mamandary jetispeıdi

AQTÓBE. QazAqparat – Aqtóbe oblysynyń Mártók aýdanynda pedagogtar, dárigerler men agrar mamandar tapshy. Bul týraly Qudaıbergen Jubanov atyndaǵy Aqtóbe óńirlik memlekettik ýnıversıtetiniń túlekterimen kezdesý barysynda aýdan ákimi Ermek Kenjehanuly aıtty, dep habarlaıdy QazAqparat tilshisi.

Oqý ordasyndaǵy kezdesý «Jas maman» jáne «Dıplommen aýylǵa» baǵdarlamalaryn júzege asyrý aıasynda ótti.

Mártók aýdanynyń ákimi Ermek Kenjehanuly stýdentterge aımaqty damytýdyń basym baǵyttary, sonymen qatar pedagogıkalyq, medıtsınalyq kadrlar men aýylsharýashylyq salasy mamandarynyń tapshylyǵy týraly aıtyp berdi. Sondaı-aq, ol jas mamandardy memlekettik qoldaýǵa, atap aıtqanda 265 100 teńge mólsherinde járdemaqy alýǵa, 1500 AEK kóleminde turǵyn úı satyp alýǵa beriletin nesıege basa nazar aýdardy. Bul shamamen 0,01% paıyzdyq ústememen 4 mıllıon teńgeni quraıdy.

«Ótken jyly aýdanǵa kelgen 68 jas maman kóterme járdemaqy aldy, al 49 adamǵa turǵyn úı alýǵa nesıe berildi», - dedi aýdan ákimi.

Sonymen qatar ol aýdannyń aýyldyq mektepterinde bastaýysh synyptar men matematıka, orys tili, tarıh jáne shet tilderi pánderiniń muǵalimderi qajet ekenin aıtty.

Jubanov ýnıversıtetiniń málimetinshe, kadr jetispeýshiligin toltyra alatyn 160-qa jýyq bolashaq maman 2020 jyly atalǵan mamandyqtar boıynsha oqý bitiredi. Alaıda jas kadrlardyń aýylǵa barar-barmaıtyny áli belgisiz.

Mártóktegi №2 mektep-gımnazııa bazasynda ýnıversıtettiń fılologııa fakýltetiniń «Shetel fılologııasy jáne aýdarma isi», «Aǵylshyn jáne nemis tilderi» jáne «Teorııalyq jáne qoldanbaly lıngvıstıka» kafedralary ashyldy. Onda ýnıversıtet mamandary men mektep muǵalimderi tájirıbe almasady, muǵalimder men mektep oqýshylaryna arnalǵan semınarlar ótedi. Áleýmettik qoldaý kórsetý maqsatynda Mártók aýdany mektepterindegi úsh túlek Q.Jubanovtyń grantyn aldy.