Aqtóbe oblysy aýmaǵynda áli de joldar jabyq
AQTÓBE. QazAqparat – Aqtóbe oblysy aýmaǵynda oblystyq jáne respýblıkalyq mańyzy bar birneshe jolǵa shekteý qoıylǵan, dep habarlaıdy QazAqparat tilshisi.
Aqtóbe oblystyq jolaýshylar kóligi jáne avtomobıl joldary basqarmasynyń málimetine súıensek, joldar keshe jabyldy. 17 aqpan kúni 20:40-ta aýa raıynyń nasharlaýyna baılanysty oblystyq tas joldarda barlyq avtokólik túrlerine qozǵalys toqtatyldy. Olar:
1. «Shubarqudyq-Oıyl-Qobda-Sol-Iletsk shekarasy» (0-372 sh. Shubarqudyq aaýyly - Sol-Iletsk shekarasy).
2. «Aqtóbe-Bolgarka-Shubarqudyq» (17-191 sh. Sazdy aýyly- Shubarqudyq aýyly).
3. «Pokrovka-Temir-Keńkııaq-Embi» (0-179 sh. Pokrovka aýyly- Embi qalasy).
4. «Dóń-Badamsha «Aqtóbe-Orsk»» (0-82 sh. Dóń aýyly- Badamsha aýyly).
Aıta keteıik, «QazAvtoJol» JShS-niń málimetine súıensek respýblıkalyq mańyzy bar joldar da jabyq.
17 aqpan kúni saǵat 20: 45-te aýa raıynyń nasharlaýyna baılanysty Aqtóbe-Atyraý-Astrahan shekarasy tasjolynyń 92 shaqyrymynan (Qandyaǵash qalasy) - 330 shaqyrymyna deıin (Noǵaıty aýyly), Coltústik aınalma tas jolynyń 29 shaqyrymynan - 35 shaqyrymyna deıin shekteý qoıyldy. Sonymen birge 18 aqpan kúni 00:10-da «Aqtóbe - Orsk» tas jolynyń 39 shaqyrymynan (Sh. Qaldaıaqov aýyly) 136 shaqyrymyna deıin (Orsk shekarasy) júk jáne jolaýshy avtokólikteri úshin qozǵalysqa shekteý qoıyldy.
