Aqtóbe oblysy ákiminiń óńir boıynsha jumys sapary barysynda úsh mektep ashyldy (FOTO)
AQTÓBE. QazAqparat - Bilim kúninde óńir basshysy Arhımed Muhambetov shalǵaıdaǵy Baıǵanın aýdanyna jol tartty, ol 60 oryndyq ınternattyń, 300 oqýshyǵa arnalyp salynǵan T. Jarmaǵambetov atyndaǵy jańa orta mekteptiń ashylýyna qatysty.
Smetalyq quny 746 mıllıon teńge bolatyn iri bilim berý nysanyn «Babek Qurylys» JShS saldy. Mektepte zamanaýı jabdyqtarmen jaraqtalǵan 19 oqý bólmesi, barlyq negizgi pán boıynsha mamandandyrylǵan kabınetter bar. Internatta bir bólmede 2 jáne 3 baladan turady, munda bilim alý úshin, sportpen, shyǵarmashylyq qyzmetpen aınalysý úshin barlyq qajetti jaǵdaılar jasalǵan. Eki nysan da gazben jabdyqtalǵan.
Sosyn Arhımed Muhambetov Alǵa aýdanynda eki bilim berý nysanynyń ashylý rásimine qatysty, atap aıtqanda, Besqospa kentindegi 60 oryndyq orta mektep pen Alǵa aýdanynyń ortalyǵynda dene shynyqtyrý-saýyqtyrý kesheni. Birinshi nysan Memleket basshysy N. Nazarbaevtyń apatty mektepterdi joıý tapsyrmasy aıasynda salyndy. 74 aýlasy bar Besqospa aýyly aýmaqtyq jaǵynan Aqtóbe aglomeratsııasyna kiredi, ol gazben, sýmen jabdyqtaldy. 324 úı salýǵa arnalǵan bas damý jospary bar. Jańa mektep aýyldy damytý perspektıvasymen salyndy.
Eki mekteptiń ashylý rásiminde de oblys ákimi aýyl turǵyndary aldynda sóz sóılep, Bilim kúnimen, jańa oqý oryndarynyń engizilýimen quttyqtady, sondaı-aq ol birinshi synyp oqýshylaryna el perezıdenti N. Nazarbaevtyń atynan Memleket basshysynyń «Meniń otanym - Qazaqstan» atty kitabyn syıǵa tartty.
Alǵa aýdan ortalyǵynda Eset batyr atyndaǵy dene shynyqtyrý- saýyqtyrý kesheni jergilikti BJSM janynan ashyldy. Ol 400 adamǵa arnalyp salynǵan. Bul jerde sport-oıyn túrleri, jekpe-jekke arnalǵan zaldar bar. Jalpy alańy 1260 metrdi quraıdy. Jańa nysannyń engizilýi halyqtyń sportpen, dene tárbıesimen aınalysýyna septigi tıedi.
