Aqtóbe oblystyq veterınarııa basqarmasy Hromtaýdaǵy epızotııalyq jaǵdaıǵa qatysty túsinikteme berdi
AQTÓBE. QazAqparat - Aqtóbe oblysy, Hromtaý aýdanynda iri qara maldan aýrý anyqtady. Oblystyq veterınarııa basqarmasy iri qaranyń jappaı ýlanǵanyn rastap otyr, dep habarlaıdy QazAqparat tilshisi.
Aqtóbelik belsendi Baqytjan Qurmanov áleýmettik jelidegi paraqshaǵa iri qaranyń jappaı aýyryp, jumysshylardyń ony soıyp jatqan beınematerıalyn jarııalap jiberdi. Kóptiń talqysyna túsken beınematerıal Hromtaý aýdany, Qopa selolyq okrýginde bolǵan.
«Angýs tuqymdy iri qara maly qyrylyp jatyr degen habar jetti. Іri qaranyń qandaı aýrýǵa shaldyqqany belgisiz. Qazir mal soıylyp, Alǵa qalasyndaǵy et kombınatyna jetkizilip jatyr. Aqtóbedegi veterınarııa qyzmetkerleri mán-jaıdy túsindirmedi», - dep jazdy Baqytjan Qurmanov.
Keıin bul oqıǵaǵa baılanysty Aqtóbe oblystyq veterınarııa basqarmasy óz jaýabyn berdi.
«Hromtaý aýdany, Qopa aýylynda ornalasqan «AkTep» JShS-nyń asyl tuqymdy iri qara maldyń jappaı aýrýy tirkeldi. Onyń sebepterin anyqtaý maqsatynda oblystyń veterınar mamandary baryp, jaǵdaımen jeke tanysty. Jumys barysynda «AkTep» JShS-nyń asyl tuqymdy múıizdi iri qara maldary aýyryp, onyń 124 basy eriksiz pyshaqqa ilingeni anyqtaldy. Jaryp, soıý barysynda maldyń ishki qurylysyndaǵy ózgerister belgili boldy. Aldyn ala boljam boıynsha mal ýlanǵan. Qazirgi kezde maldyń jappaı aýrýǵa shaldyǵýyna baılanysty onyń negizgi sebebin anyqtaý jumystary júrip jatyr. Synamalar alynyp, veterınarııalyq zerthanaǵa jóneltildi. 19 tamyzdan bastap maldyń jappaı aýrýy toqtady, eriksiz soıylǵan maldyń eti órteldi, joıyldy. Búginde epızotııalyq jaǵdaı turaqty baqylaýǵa alyndy»,- dep habarlady basqarmadan.
