Aqtóbe oblystyq soty zorlyq-zombylyq kórgen balalardyń taǵdyryna alańdaýly
AQTÓBE. QazAqparat - Aqtóbede ákesi týǵan qyzyna, aǵasy qaryndasyna seksýaldyq zorlyq kórsetken qylmystyq isterdi mysalǵa keltirip, qoǵam nazaryn aýdardy, dep habarlaıdy QazAqparat tilshisi.
Aqtóbe oblystyq sotynyń tóraǵasy Abdolla Sáken búgin birinshi toqsandy qorytyndylap, jýrnalısterge sot organdarynyń jumysyn baıandap berdi. Jyl basynan beri óńirde 460 qylmystyq is qaraldy. Olardyń 283-ne qatysty úkim shyǵyp, 307 adam sottaldy, 8 adam aqtaldy. Oblys sotynyń tóraǵasy Abdolla Sáken qoǵamdy alańdatýy tıis máseleler týraly da aıtty.
«Biz ǵana emes, qoǵam nazaryn aýdarýy tıis máseleler bar. Máselen, eki qylmystyq iske úkim shyǵyp, úkim zańdy kúshine endi. Aqtóbede ákesi týǵan qyzyn 2-3 jyl boıy zorlaǵan. Qyzy 11-12 jas shamasynda. Ekinshi iste aǵasy týǵan qaryndasyna 2-3 jyl boıy seksýaldyq zorlyq jasaǵany anyqtaldy. Olar da jasóspirim. Balalar týǵandaryna senedi, olarǵa shúbá keltirmeıdi. Bul jaǵdaı qyz balanyń júktiligi kezinde anyqtaldy. Mektep muǵalimi bilip, sodan keıin ǵana is qozǵaldy», - dedi oblystyq sotynyń tóraǵasy Abdolla Sáken.
Aqtóbe oblysynda ázirge hımııalyq kastratsııalaý úkimi shyǵarylǵan joq. Abdolla Sáken óz sózinde ata-ananyń muqııat bolýyn, balamen barlyq taqyrypta erkin sóılesýge, ashyq áńgime aıtýǵa keńes berdi.
«Eń úlken tárbıe adamnyń sózi emes, isi. Ata-ana balanyń tárbıesinde jabyq taqyryptardy qozǵap, balalardy aqparattandyrýy kerek. Bul tek bir otbasynyń emes, qazir qoǵamnyń ózekti máselesine aınaldy. Qoǵam nazar aýdaryp, birlese sheshý jolyn oılastyrǵan jón. Buqaralyq aqparat quraldary arqyly aıtyp, mundaı máselege beıjaı qaraýǵa bolmaıtynyn jetkizgem keledi», - dedi Aqtóbe oblystyq sotynyń tóraǵasy Abdolla Sáken.
