Aqtóbe oblystyq Polıtsııa departamentine jańa basshy taǵaıyndaldy
NUR-SULTAN. QazAqparat -Aqtóbe oblystyq Polıtsııa departamentine jańa basshy keldi. Atalmysh qyzmetke polıtsııa polkovnıgi Atyǵaı Arystanov taǵaıyndaldy. Bul týraly QR Іshki ister mınıstrliginiń resmı ókili Nurdildá Oraz feısbýktegi paraqshasynda jazdy.
«Aqtóbe oblysynyń Polıtsııa departamenti bastyǵy laýazymyna polıtsııa polkovnıgi Arystanov Atyǵaı Ǵazymbekuly taǵaıyndaldy. Jańa basshyny jeke quramǵa Іshki ister mınıstri Erlan Turǵymbaev pen oblys ákimi Ońdasyn Orazalın ózi tanystyrdy»,-dep jazdy resmı ókil.
Onyń jazýynsha, Atyǵaı Ǵazymbekuly kóptegen basshylyq laýazymdarda qyzmet atqarǵan. Tájirıbesi mol. Ár jyldary uıymdasqan qylmys, ekstremızm, múliktik qylmystarǵa qarsy kúres bólinisterinde jumys istep, qylmystyq izdestirý bólinisterin basqardy.
Almaty qalasy Bostandyq aýdany Polıtsııa basqarmasynyń bastyǵy, Qostanaı oblysy Polıtsııa departamenti bastyǵynyń birinshi orynbasary bolyp qyzmet atqardy.
Sońǵy 3 jylda ortalyq apparatta Krımınaldyq polıtsııa departamenti bastyǵynyń orynbasary, Ekstremızmge qarsy kúres departamentiniń bastyǵy bolyp jumys istegen.
«Mınıstr jańa basshynyń jumysyna sáttilik tileı otyryp, QR Prezıdentiniń tapsyrmasyn oryndaý, oblystaǵy qoǵamdyq tártipti saqtaý jáne qylmysqa qarsy kúreste azamattardyń quqyǵyn qorǵaýǵa qajetti barlyq sharalardy júzege asyratynyna senim bildirdi!
Esterińizde bolsa, osydan sál buryn Aqtóbe oblystyq Polıtsııa departamentiniń burynǵy basshysy, polıtsııa general-maıory Abısatov Maxambet Haıyrjanuly Іshki ister mınıstriniń orynbasary laýazymyna taǵaıyndalǵan bolatyn»,-dep habarlady mınıstrlik ókili.
