Aqtóbe oblystyq polıtsııa departamenti bastyǵynyń eks-orynbasary sot aldynda jaýap berdi
AQTÓBE. QazAqparat - Aqtóbe qalalyq sotynda oblystyq polıtsııa departamenti bastyǵynyń eks-orynbasary Altaı Ańshybaevqa qatysty sot aldy tergeý aıaqtaldy. Búgin burynǵy polıtsııa qyzmetkeri sottan kepilmen bostandyqqa shyǵarýdy surady, dep habarlaıdy QazAqparat tilshisi.
Aqtóbe oblystyq polıtsııa departamenti bastyǵynyń eks-orynbasary Altaı Ańshybaevqa osy jyldyń mamyr aıynda ustalyp, qamaldy. Buǵan deıin habarlaǵanymyzdaı, burynǵy polıtsııa qyzmetkeri «jóndeý jumystaryna bólingen qarjyny talan-tarajǵa saldy» degen kúdikke ilikti. Al búgin №2 Aqtóbe qalalyq sotynda Altaı Ańshybaevqa qatysty is túsip, Qylmystyq kodekstiń «Senip tapsyrylǵan bóten múlikti ıemdenip alý nemese talan-tarajǵa salý» baby boıynsha negizgi sot otyrysy bolatyn kún anyqtaldy.
«Meniń tórt balam bar. Onyń úsheýi kámelet jasqa tolmaǵan. Men 29 jyl boıy quqyq qorǵaý salasynda eńbek etip kelemin. Oblystyq polıtsııa departamentiniń bastyǵy qylmystyq is qozǵalǵan kezde mendi jumystan shyǵaryp jiberdi. Al qyzmettik páterdi 10 kúnniń ishinde bosatýym kerek. Ári baýyr tserrozy dertine shaldyǵyp, em aldym. Qamaýǵa alynǵan kezde meni Batys Qazaqstan oblysynda statsıonarlyq em qabyldadym. Osy jaǵdaılardy eskerip, meni kepilmen bostandyqqa jiberýdi suraımyn», - dedi aıyptalýshy Altaı Ańshybaev.
Sot otyrysy kezinde Altaı Ańshybaevtyń qorǵaýshylary shyǵyndy esepteýge arnalǵan saraptama qorytyndysyn joqqa shyǵaryp, qaıta esepteýdi surady. Sonymen qatar, qurylys jumystary, jóndeý kezindegi 200 myń men 6 mıllıon teńge arasyndaǵy 5 memlekettik satyp alý jumystarynyń shyǵyny durys eseptelmegen degen ýáj aıtty. Qazirgi ýaqytta shyǵyn kólemi 12 mıllıon teńgege jýyq dep eseptelgen. Al prokýror Jánibek Tórebekov tergeý jumystary tolyq júrgizilgenin, negizgi sot otyrysyn bastaýdy surady. Onyń aıtýynsha, aıyptalýshyny kepilmen bosatýǵa esh negiz joq.
