Aqtóbe oblystyq jumyldyrý daıarlyǵy, aýmaqtyq qorǵanys basqarmasy basshysy taǵaıyndaldy

AQTÓBE. KAZINFORM – Aqtóbe oblystyq jumyldyrý daıarlyǵy, aýmaqtyq qorǵanys jáne azamattyq qorǵaý basqarmasyna Temirjan Bólteev taǵaıyndaldy. Ol buǵan deıin kommýnaldyq mekemede basshy bolǵan.

Aqtóbede QR Memlekettik qyzmet isteri agenttiginiń kelisimimen Jumyldyrý daıarlyǵy, aýmaqtyq qorǵanys jáne azamattyq qorǵaý basqarmasynyń basshysy qyzmetine Temirjan Bólteev taǵaıyndaldy. Ol 1963 jyly Aqtóbe oblysynda dúnıege kelgen. 1989 jyly Qaraǵandy pedagogıkalyq ınstıtýtyn «Alǵashqy áskerı daıyndyq jáne dene tárbıesi», 2007 jyly Q.Jubanov atyndaǵy Aqtóbe memlekettik ýnıversıtetin «Zańtaný» mamandyqtary boıynsha támamdaǵan. Aqtóbe oblysy ákimini baspasóz qyzmetiniń habarlaýynsha, eńbek jolyn 1980 jyly Baıǵanın orta kásiptik-tehnıkalyq ýchılışesiniń traktorısi bolyp bastaǵan. 1981–1984 jyldary «Aktıýbselstroı» kásipornynda jumysshy, «Selhozenergo» kásipornynda elektromonter boldy. Al 1989–1999 jyldary Jańajol orta mektebinde alǵashqy áskerı daıarlyq jetekshisi, Baıǵanın aýdandyq kásiptik-tehnıkalyq ýchılışesiniń áskerıdaıarlyq oqytýshysy, Baıǵanın aýdandyq áskerı komıssardyń orynbasary, áskerı komıssary bolyp jumys istegen. 

— 1999–2015 jyldary Muǵaljar aýdanynyń áskerı komıssary, Aqtóbe qalasynyń qorǵanys isteri jónindegi basqarmasynyń bastyǵy, 30217 áskerı bóliminiń shtab bastyǵy — brıgada komandıriniń birinshi orynbasary, Mańǵystaý oblysynyń qorǵanys isteri jónindegi departamentiniń bastyǵy, «Shyǵys» óńirlik qolbasshylyǵy áskerleri shtab bastyǵynyń orynbasary — shtabtyń uıymdastyrý — jumyldyrý basqarmasynyń bastyǵy qyzmetterin atqarǵan. 2020–2024 jyldary Aqtóbe oblysy ákimi apparatynyń «Jumyldyrý daıyndyǵy jáne aýmaqtyq qorǵanys basqarmasy» kommýnaldyq memlekettik mekemesiniń basshysy, 2024 jyldyń tamyz aıynan bastap Aqtóbe oblysynyń jumyldyrý daıarlyǵy, aýmaqtyq qorǵanys jáne azamattyq qorǵaý basqarmasynyń «Jumyldyrý daıyndyǵyn qamtamasyz etý, aýmaqtyq qorǵanys jáne azamattyq qorǵaý qyzmeti» kommýnaldyq memlekettik mekemesiniń basshysy qyzmetin atqaryp keldi, — dep habarlady Aqtóbe oblysy ákimini baspasóz qyzmeti. 

Aıta keteıik, Aqtóbede qazirgi kezde birneshe basqarma basshysynyń orny bos tur. Taıaýda ǵana aýyl sharýashylyǵy,  memlekettik sáýlet jáne qurylys basqarmasynyń basshylary taǵaıyndaldy.