Aqtóbe oblystyq dene shynyqtyrý jáne sport basqarmasyna jańa basshy keldi
AQTÓBE. KAZINFORM — Aqtóbe oblystyq dene shynyqtyrý jáne sport basqarmasynyń basshysy qyzmetine Meırambek Mahambetov taǵaıyndaldy. Ol osy qyzmetke ekinshi ret kelip tur.
QR Memlekettik qyzmet isteri agenttigi, Týrızm jáne sport mınıstrliginiń kelisimimen Meırambek Mahambetov qyzmetke keldi.
Ol 1989 jyly Aqtóbe qalasynda dúnıege kelgen. L. N. Gýmılev atyndaǵy Eýrazııa ulttyq ýnıversıtetin «Aımaqtaný», 2014 jyly «Kókshe» akademııasyn «Dene shynyqtyrý jáne sport» mamandyqtary boıynsha támamdaǵan.
Eńbek jolyn 2011 jyly QR Týrızm jáne sport mınıstrliginiń sport boıynsha Komıtetiniń referenti bolyp bastaǵan.
— 2011-2014 jyldary QR Týrızm jáne sport mınıstrliginiń Sport komıtetiniń quqyqtyq qamtamasyz etý jáne ákimshilendirý basqarmasynyń sarapshysy, QR Sport jáne dene shynyqtyrý isteri agenttiginiń dene shynyqtyrý departamentiniń buqaralyq sportty damytý basqarmasynyń sarapshysy jáne bas sarapshysy bolyp jumys istegen. 2014-2018 jyldary QR Mádenıet jáne sport mınıstrliginiń Sport jáne dene shynyqtyrý isteri komıtetiniń buqaralyq jáne olımpıadalyq emes sport túrlerin damytý basqarmasynyń bas sarapshysy, ákimshilik jáne kadr jumysy basqarmasynyń basshysy, qysqy sport túrleri basqarmasynyń basshysy bolyp qyzmet etken, — dep habarlady Aqtóbe oblysy ákiminiń baspasóz qyzmeti.
Al 2018-2020 jyldary Aqtóbe oblysynyń dene shynyqtyrý jáne sport, Aqtóbe oblysynyń jastar saıasaty máseleleri basqarmalaryn basqardy. 2020-2024 jyldary Mádenıet jáne sport mınıstrligi Sport jáne dene shynyqtyrý isteri komıtetiniń Ulttyq sport túrleri jáne sporttaǵy múmkindikteri shekteýli adamdarmen jumys jónindegi basqarmasynyń basshysy, Dene múmkindikteri shekteýli adamdarǵa arnalǵan sporttyq daıarlaý ortalyǵynyń dırektory, Qazaqstannyń kásibı fýtbol lıgasynyń atqarýshy dırektory qyzmetterin atqardy. Sonymen birge 2024 jyldyń qańtar aıynan bastap respýblıkalyq sýrdo fýtbol jáne fýtzal federatsııasynyń prezıdenti qyzmetin atqaryp keldi.
Eske salsaq, ótken aptada Aqtóbede densaýlyq saqtaý basqarmasynyń jáne bilim basqarmasynyń basshylary taǵaıyndaldy.