Aqtóbe oblystyq bilim basqarmasy kolledjdegi oqý aqysynyń kóterilýine qatysty túsinikteme berdi
AQTÓBE. KAZINFORM – Basqarma joǵary kópsalaly «Bolashaq» kolledjinniń málimetine súıenip, aqparat taratty. Jeke oqý ornynda memlekettik tapsyrys joq, sáıkesinshe mundaǵy oqý aqysyna aralasý múmkin emes.
Aqtóbe qalasyndaǵy Joǵary kópsalaly «Bolashaq» kolledjinniń stýdentteri men ata-analary oqý aqysynyń birden 93% kóterilgenin aıtyp, narazylyǵyn bildirdi. Bul oqıǵadan keıin Aqtóbe oblystyq bilim basqarmasy jeke oqý ornynyń ishki jumysyna aralasa almaıtynyn, alaıda bári zańǵa saı rettelýi tıis ekenin habarlady.
- QR«Bilim týraly» Zańynyń 63-babyna sáıkes aqyly bilim berý qyzmetterin kórsetetin bilim berý uıymy men bilim alýshy nemese onyń zańdy ókili arasyndaǵy ózara qarym-qatynastar bilim berý qyzmetterin kórsetý týraly shartpen retteledi. Osy máseleniń mán-jaıyn anyqtaý maqsatynda Aqtóbe oblysynyń bilim basqarmasy «Bolashaq» joǵary kópsalaly kolledjiniń basshylyǵynan tıisti aqparat suratty. Aıta ketý qajet, atalǵan kolledjde memlekettik bilim berý tapsyrysy ornalastyrylmaıdy. Kolledj dırektorynyń qyzmettik túsindirme jazbasyna sáıkes, oqý aqysynyń kóterilýine narazylyq bildirgen stýdenttermen túsindirý jumystary júrgizilgen. Kezdesýler barysynda stýdentterge oqý aqysynyń ósýine ekonomıkalyq jaǵdaıdyń ózgerýi, kommýnaldyq qyzmetter tarıfiniń ósýi, sondaı-aq oqytýshylardyń eńbekaqysyn tóleýge jumsalatyn shyǵyndardyń artýy sebep boldy dep túsindirgen. Kolledj basshylyǵynyń aqparaty boıynsha, oqý aqysy bilim berý qyzmetterin kórsetý týraly sharttyń 3.8-tarmaqshasyna sáıkes kóterilgen. Mamandyqqa baılanysty oqý aqysynyń ósýi 30–50 paıyzdy quraǵan,- dep habarlady Aqtóbe oblystyq bilim basqamasynyń baspasóz qyzmeti.
Basqarma taratqan aqparatqa súıensek, kolledj dırektory áleýmettik qoldaýdy qajet etetin stýdentterge erekshe nazar aýdarylatynyn atap ótken. ıAǵnı kópbalaly, tolyq emes otbasynda tárbıelenip jatqan stýdentterge jeńildik qarastyrylǵan. Sonymen birge erekshe balasy bar otbasyna jeńildik beriledi.
Eske salsaq, Joǵary kópsalaly «Bolashaq» kolledjinde oqý aqysy birden 200 000 teńgege kóterildi. Buryn 450 000 teńge tólep júrgen stýdentter endi 650 000 teńge tóleýge qarsy. Keshe ata-analar men stýdentter kolledjge jınalyp, shaǵymyn jetkizdi.
