Aqtóbe oblystyq ákimdigi ǵımaratynyń órtten keıingi shyǵyny anyqtaldy
AQTÓBE. KAZINFORM - Shyǵyn kólemi - 90 mln teńge. Qazirgi kezde qalpyna keltirý jumysy bastaldy.
Aqtóbe oblystyq ákimdigi ǵımaraty shatyryndaǵy órttiń shyǵý sebebi áli naqty emes. Tótenshe jaǵdaılar qyzmeti buǵan deıin elektr togynyń qysqa tuıyqtalýy degen boljam jasady. Arada bir aı ótkende jóndeý jumysy bastaldy.
- Qazirgi ýaqytta órttiń shyǵý sebepteri anyqtalyp jatyr. Tıisti saraptamalar, onyń ishinde órt-tehnıkalyq jáne elektrotehnıkalyq saraptamalar taǵaıyndaldy. Atalǵan fakti boıynsha Qylmystyq kodeksiniń 292-baby 2-bóligi boıynsha sotqa deıingi tergep-tekserý júrgizilýde. Órt sóndirilgennen keıin orny tazartylyp, jóndeý-qalpyna keltirý jumystary bastalǵanyn habarlaımyz. Aldyn ala baǵalaý boıynsha jalpy materıaldyq shyǵyn shamamen 90 mıllıon teńge boldy. Qalpyna keltirý jumystary Aqtóbe oblysynyń tótenshe jaǵdaılar rezervi esebinen qarjylandyryldy,- dep habarlady Aqtóbe oblysy ákiminiń baspasóz qyzmeti.
Jóndeý jumystaryn mamandandyrylǵan kompanııa júzege asyrady. Oǵan jumysty tez ári sapaly aıaqtaý tapsyryldy.
Eske salsaq, 7-sáýir kúni keshkilik Aqtóbe oblystyq ákimdigi ǵımaratynan órt shyqty.
Órt aýdany 300 sharshy metrdi qurady. Eshkim zardap shekken joq.
Bir kúnnen soń órt elektr togynyń qysqa tuıyqtalýynan bolýy múmkin ekeni aıtyldy.
