Aqtóbe oblysynyń úsh aýdanynda saılanǵan ákimderdiń aty-jóni belgili boldy

Aqtóbe oblysynyń úsh aýdanynda saılanǵan ákimderdiń aty-jóni belgili boldy. Aqtóbeniń Yrǵyz aýdanyna Nurlan Qyzbergenov, Qobda aýdanyna Іzgilik Tynymgereev, Oıyl aýdanyna Asqar Qazybaev saılandy, dep habarlaıdy Kazinform. 

Keshe Aqtóbeniń Qobda, Oıyl, Yrǵyz aýdandarynda saılaý ótti. Saılaýshylar tiziminde barlyǵy 28 myńnan astam adam bar. Olardyń 20 myńnan astamy óz tańdaýyn jasaǵan. Úsh aýdan boıynsha 429 adam úıden daýys berýge ótinish bildirip, jyljymaly ýrnalar jetkizildi. Nátıjesi qazir belgili.

«Qobda aýdany boıynsha Іzgilik Tynymgereev saılandy. Ol 1978 jyly týǵan. Búginge deıin Qobda aýdany ákiminiń orynbasary qyzmetin atqardy. Oıyl aýdanyna ákim bolyp Asqar Qazybaev saılandy. 1962 jyly týǵan. Búginge deıin Oıyl aýdanynyń ákimi qyzmetin atqardy. Al Yrǵyz aýdany boıynsha Nurlan Qyzbergenov saılandy. Ol 1968 jyly týǵan. Buǵan deıin Yrǵyz aýdanynyń ákimi boldy», - dep habarlady Aqtóbe oblystyq aýmaqtyq saılaý komıssııasy.

Aıta keteıik, ár aýdannan úsh kandıdattan tirkeldi. Daýys berýshilerdiń 240-y bıýlletendegi «bárine qarsymyn» tusyn belgilegen.