Aqtóbe oblysynyń Yrǵyz aýdanyna qosymsha tehnıka jiberildi
ASTANA. KAZINFORM — Mundaı sheshim Torǵaı ózeniniń jaǵasynda ornalasqan aýyldardaǵy bógetterdi tekserý nátıjesinde qabyldandy.
10 sáýirde vıtse-premer Serik Jumanǵarın Tótenshe jaǵdaılar vıtse-mınıstri Serik Tólenbergenov jáne Aqtóbe oblysy boıynsha tótenshe jaǵdaılar departamentiniń basshysy Nurǵalı Júnisovpen birge Yrǵyz aýdanyndaǵy jol qatynasy úzilgen aýyldardyń ústinen ushyp ótti.
Munda jergilikti tótenshe jaǵdaı rejımi sońǵy ret 8 sáýir kúni jarııalandy.
Tasqyn saldarynan jol ýchaskelerin sý shaıyp ketýine baılanysty 12 eldi meken jol qatynasynsyz qaldy.
Yrǵyz aýdanynda 2637 turǵyn úıde 2800-den astam otbasy turady, onyń ishinde 1282 úı Yrǵyzdyń aýdan ortalyǵynda ornalasqan.
Yrǵyz aýylyna barǵan jumys saparynda Serik Jumanǵarın aýdan ákimi Nurlan Qyzbergenovpen sý tasqynyna qarsy jumystardyń aǵymdaǵy jaǵdaıyn talqylady.
Ákim bir saǵat buryn ǵana Mamyr jáne Nura aýyldary ornalasqan Torǵaı ózeniniń joǵarǵy aǵysynda sý kóterile bastaǵanyn jetkizdi.
Jaǵdaıdyń aýqymyn jáne jańa sý basý qaýpin baqylaý úshin Premer-Mınıstrdiń orynbasary ushý kezinde Yrǵyz óńiriniń jaǵdaıyn, Torǵaı ózeniniń joǵary jaǵynda ornalasqan Aqtóbedegi Mamyr jáne Qostanaı oblysynyń Aqshyǵanaq aýyldaryndaǵy bógetterdiń jaı-kúıimen tanysty.
Tekserý qorytyndysyna sáıkes Aqtóbe oblysynyń Mamyr jáne Nura aýyldaryndaǵy bógetterdi nyǵaıtý týraly sheshim qabyldandy.
Ol úshin TJM Aqtóbe oblysy boıynsha áskerı bóliminen jáne tótenshe jaǵdaılar departamentinen 14 adam men 8 tehnıka (4 samosval, 2 tral jáne 2 júk tıegish) jedel túrde aýdanǵa jiberildi.
Aqtóbeden Yrǵyzǵa deıin araqashyqtyq 430 shaqyrym bolsa, Mamyr aýylyna deıingi araqashyqtyq — 130 shaqyrym.
Búgin tańerteń tehnıka Yrǵyzǵa kelip úlgerdi, jaqyn arada Mamyr men Nurada jumysyn bastaıdy.
