Aqtóbe oblysynyń aýylynda qaıtarylǵan aktıvter qarajatyna medıtsınalyq pýnkt salyndy
AQTÓBE. KAZINFORM — Aýyldyq jerlerde medıtsınalyq ınfraqurylym salýǵa 144 mlrd teńgeden astam qarjy bólindi. Bul týraly Úkimettiń baspasóz qyzmeti habarlady.
Úkimettiń basym mindetteriniń biri – halyqty sapaly jáne qoljetimdi densaýlyq saqtaý qyzmetterimen qamtamasyz etý. Osy baǵytty júzege asyrý jáne Prezıdenttiń áleýmettik ınfraqurylymdy damytý jónindegi tapsyrmasyn oryndaý maqsatynda Aqtóbe oblysy Qobda aýdany Begaly aýylynda jańa medıtsınalyq pýnkt ashyldy.
Nysan «Aýylda densaýlyq saqtaýdy jańǵyrtý» ulttyq jobasy aıasynda salynǵan nysannyń jalpy quny – 132 mln teńge, onyń 65 mln teńgesin Úkimet Arnaýly memlekettik qordan bóldi.
Aýdany 150 sharshy metrden asatyn jańa ǵımarat bir aýysymda 25 kelýge arnalǵan. Medıtsınalyq pýnktti paıdalanýǵa berý aýyldyń 300-den astam turǵynyn sapaly jáne ýaqtyly medıtsınalyq kómekpen qamtamasyz etýge múmkindik beredi. Nysan zamanaýı qurylǵylarmen jabdyqtalǵan.
Qurylys kezinde ınklıýzıvtilikke, qımyl-qozǵalysy shekteýli adamdardyń qoljetimdiligin qamtamasyz etýge kóńil bólindi.
Medıtsınalyq nysannyń ashylýy aýyl turǵyndarynyń alǵashqy medıtsınalyq-sanıtarııalyq kómekke qoljetimdiligin arttyrady, sondaı-aq medıtsına qyzmetkerleriniń eńbek jaǵdaıyn jaqsartady.
Aqtóbe oblysynda qaıtarylǵan aktıvter qarajaty esebinen qurylǵan Arnaýly memlekettik qordan aýyldyq densaýlyq saqtaý salasy boıynsha barlyǵy 11 joba júzege asyrylyp jatyr. Búgingi tańda 5 nysan paıdalanýǵa berildi, altaýynyń qurylysy jalǵasyp jatyr.
Qaıtarylǵan aktıvter qarajatyn paıdalana otyryp, densaýlyq saqtaý salasyn damytý jumystary búkil el boıynsha júrgizilýde. 2024-2025 jyldar aralyǵynda densaýlyq saqtaý nysandaryn salýǵa jáne jańǵyrtýǵa Arnaýly memlekettik qordan 144,2 mlrd teńge bólindi. Infraqurylymdy aýqymdy jańartý aýyl turǵyndaryn qalaǵa barmaı-aq sapaly medıtsınalyq qyzmetter men tekserýlerge qoljetimdilikpen qamtýdy keńeıtýge múmkindik berdi.
Jalpy, «Aýyldyq densaýlyq saqtaýdy jańǵyrtý» ulttyq jobasy aıasynda 2022-2025 jyldar aralyǵynda aýyldyq jerlerde 813 densaýlyq saqtaý nysany, onyń 620 alǵashqy medıtsınalyq-sanıtarııalyq kómek nysany salyndy. Naqtyraq aıtsaq, 2024 jyly 392 nysan paıdalanýǵa berilse, 2025 jylǵa qosymsha 188 nysandy salý josparlanǵan.
Zamanaýı aýdanaralyq aýrýhanalar men MSAK jelisin damytý ult densaýlyǵynyń kórsetkishterin tikeleı jaqsartty. Osylaısha, onkologııalyq aýrýlardy erte anyqtaý 3,5%-ǵa ósip, 32,6% boldy, al 60%-dan astamy bastapqy satysynda dıagnoz qoıylady. 23-i aýdandyq aýrýhanalarda ornalasqan 83 ınsýlt ortalyǵynyń jumysy trombolız úlesin 6%-ǵa deıin arttyrýǵa múmkindik berdi. Sonymen qatar jańa mamandandyrylǵan ortalyqtardyń ashylýy balalarǵa ońaltý kómeginiń qoljetimdiligin edáýir arttyrdy.
Medıtsına ınfraqurylymyn jáne qyzmet kórsetý sapasyn jaqsartý jónindegi keshendi sharalar aýyl turǵyndarynyń ómir súrý uzaqtyǵyna oń áserin tıgizdi, kórsetkish 2024 jyldyń qorytyndysy boıynsha 74,2 jasqa uzarǵan.
Aıta ketelik Aqmola oblysynda sýmen jabdyqtaý jelilerin salýǵa zańsyz aktıvter esebinen 21,5 mlrd teńge bólingen edi.