Aqtóbe oblysynyń ákimi jastarmen kezdesti
AQTÓBE. KAZINFORM - Aqtóbe oblysynyń ákimi Ashat Shaharov stýdent jastarmen qoǵamnyń damýyna negiz bolatyn jalpyǵa ortaq qundylyqtardy talqylady.
Óńir basshysymen kezdesýge oqýdaǵy jetistikterimen erekshelengen, mańyzdy sharalarda belsendilik kórsetken stýdentter qatysty. Olardyń arasynda bilim berý jáne qoǵamdyq salanyń damýyna úles qosqan túrli olımpıadalardyń, konkýrstar men bastamalardyń jeńimpazdary boldy. Dıalog alańy retinde Q. Jubanov atyndaǵy óńirlik ýnıversıtettiń kitaphanasy tańdaldy.
Ashat Shaharov jastarǵa qol jetkizgen jetistikteri úshin alǵysyn bildirip, jastardy odan ári qoldaýdyń mańyzdylyǵyn atap ótti.
«Sizder – tabandylyq pen kóshbasshylyqtyń úlgisisiz. Jetistikterińiz basqalarǵa úlgi, qajyrly eńbek pen bilimge umtylý nátıje beretinin dáleldep kelesizder», - dep atap ótti óńir basshysy.
Kezdesýde Prezıdent usynǵan negizgi ıdeologııalyq tujyrymdar, sondaı-aq qoǵamnyń odan ári damýyna negiz bolatyn jalpyǵa ortaq qundylyqtar talqylandy. Sonymen qosa, oqý jaǵdaılaryn jaqsartýǵa, talantty jastardy qoldaýǵa, stýdentterdi áleýmettik jáne eriktiler jobalaryna tartýǵa qatysty máseleler kóterildi. Qatysýshylar ózin-ózi damytýdyń jańa múmkindikterin ashý boıynsha óz ıdeıalary men usynystarymen bólisti.
Basqosýǵa qatysýshylar qoǵamnyń negizgi problemalary: nashaqorlyq, lýdomanııa, vandalızm jáne jastar arasyndaǵy qylmyspen kúresý máselelerin talqyǵa saldy. Ákim zalda otyrǵan jastarǵa arnaǵan sózinde alǵa qoıylǵan mindetterdi sheshý úshin birlesken kúsh-jiger qajet dedi. Ol búgin osy qıyndyqtardy jeńe otyryp, erteń jarqyn jáne tabysty bolashaqqa qol jetkizýge bolatyndyǵyn jetkizdi.
«Ulttyq quryltaıda sóılegen sózinde Memleket basshysy jastarǵa qatysty osy ózekti máselelerge nazar aýdardy. Búgingi tańda qoǵamda lýdomanııa, esirtki, vandalızm sııaqty jaǵymsyz qubylystar keńinen taralǵanyn moıyndaýymyz kerek. Ókinishke oraı, jastar arasynda quqyqbuzýshylyqtar jıi kezdesedi. Biz mundaı kezdesýlerdi kórsetý úshin emes, tıimdi ótkizýge mindettimiz. Osy máselelerdi kóterip, olardy sheshýdiń birlesken joldaryn izdeýimiz kerek. Óńirde halyqtyń 30 paıyzy – jastar. Ásirese, jastardy jumyspen qamtý máselelerine, aýyl jastarynyń problemalaryna kóńil bólý asa qajet. Bul kezdesý mańyzdy jáne kelesi jylǵa arnalǵan josparlardy aıqyndaıdy. Biz naqty strategııalar quryp, naqty sheshimder ázirleýimiz kerek», - dedi ákim kezdesý barysynda.
Ashat Shaharov búginde oblysta jas urpaqqa damý úshin kóptegen múmkindikter jasalǵanyn atap ótti: kovorkıng-ortalyqtar jumys isteıdi, granttyq qoldaý baǵdarlamalary ázirlendi, oqytý trenıngteri men sheberlik synyptary ótkizilýde. Ákim jastardy belsendi ári senimdi, óz ıdeıalaryn usynýdan qoryqpaýǵa jáne óz maqsattaryna berik bolýǵa shaqyrdy.
«Bizdiń aımaqtyń bolashaǵy – ózderińizge baılanysty. Boılaryńyzdaǵy talant, energııa jáne umtylystaryńyz óńirimizdiń ósip-órkendeýine sep. Biz árqashan qoldaýǵa daıynbyz», - dep sendirdi oblys ákimi.