Aqtóbe oblysynyń ákimi tarıhı Quryltaı saılaýynda daýys berdi
AQTÓBE. KAZINFORM - Búgin, 23 tamyzda Qazaqstanda el tarıhyndaǵy jańa bir palataly Quryltaı depýtattarynyń alǵashqy saılaýy ótip jatyr. Aqtóbe oblysynyń ákimi Ashat Shaharov qyzymen birge №541 saılaý ýchaskesine kelip, daýys berdi.
Óz tańdaýyn jasaǵan óńir basshysy BAQ ókilderine bergen suqbatynda búgingi saılaýdyń el ómirindegi mańyzyna toqtaldy.
-Búgin elimiz úshin shyn máninde tarıhı kún. Ózderińiz biletindeı, naýryz aıynda ótken referendýmda Qazaqstan azamattary jańa Konstıtýtsııany qabyldady. Bul – halyqtyń erik-jigerimen qabyldanǵan Konstıtýtsııa.
Jańa Ata Zań normalaryna sáıkes, búgin Quryltaı depýtattarynyń saılaýy ótip jatyr. Osylaısha, Qazaqstanda bir palataly Parlament qalyptasady.
Aqtóbe oblysynda saılaýdy daıyndaý jáne uıymdastyrý baǵytynda aýqymdy jumys atqaryldy. Osy kúni óńirde 525 saılaý ýchaskesi óz jumysyn bastady. Turǵyndardyń daýys berýge belsendi qatysyp, óz tańdaýyn jasaý úshin saılaý ýchaskelerine kóptep kelip jatqanyn kórip otyrmyz.
Búgin biz elimizdiń odan ári damý jáne jańǵyrý baǵytyn aıqyndaımyz. Aqtóbelikter aldaǵy ýaqytta da azamattyq jaýapkershilik tanytyp, Qazaqstannyń damýyna óz úlesin qosa beretinine senimdimin, – dedi Ashat Shaharov.
Daýys bergennen keıin oblys ákimi saılaý ýchaskesine kelgen turǵyndarmen tildesti. Sondaı-aq ýchaske aldynda uıymdastyrylǵan jármeńkeniń jumysymen tanysyp, saılaý kúnine oraı ótken sporttyq jarystardy tamashalady.
