Aqtóbede toıda ýlanǵan 100 adam: qylmystyq is qozǵaldy
ASTANA.KAZINFORM — Aqtóbe oblysy Muǵaljar aýdanynyń Qandyaǵash qalasyndaǵy «Tumar» meıramhanasyna toıǵa barǵan azamattar arasynda ishek ınfektsııasy tirkelgen bolatyn.
Búgin jappaı astan ýlaný faktisine qatysty Qazaqstan Respýblıkasy Qylmystyq kodeksiniń 304-baby («Sanıtarııalyq qaǵıdalardy nemese gıgıenalyq normatıvterdi buzý») belgilerimen sotqa deıingi tergep-tekserý bastalǵany habarlandy.
— Qazirgi ýaqytta oqıǵanyń barlyq mán-jaıyn jan-jaqty, tolyq jáne obektıvti anyqtaýǵa baǵyttalǵan qajetti tergeý áreketteri júrgizilip jatyr. Sotqa deıingi tergep-tekserý nátıjeleri boıynsha qoldanystaǵy zańnamaǵa sáıkes tıisti protsestik sheshim qabyldanatyn bolady, — delingen oblystyq PD baspasóz qyzmetiniń habarlamasynda.
Eske sala keteıik, Muǵaljar aýdandyq aýrýhanasy men oblystyq klınıkalyq juqpaly aýrýlar aýrýhanasyna ishek ınfektsııasynyń belgilerimen 102 naýqas medıtsınalyq kómekke júginip, aýrýhanaǵa jatqyzylǵan bolatyn.
Onyń ishinde 34 naýqasta salmonellezdiń yqtımal jaǵdaıy tirkeldi. Atalǵan jaǵdaılar boıynsha Aqtóbe oblysynyń Sanıtarııalyq-epıdemıologııalyq baqylaý departamentine shuǵyl habarlamalar joldanyp, bakterıologııalyq zertteý júrgizý úshin synamalar alynǵany habarlandy.
