Aqtóbe oblysyndaǵy tasqynnan zardap shekkenderden 300-den astam ótinish tústi
AQTÓBE. KAZINFORM – Oblys boıynsha 94 zardap shekken turǵynǵa 28 mln teńge kóleminde birjolǵy áleýmettik tólemder tólendi. Jalpy 2024 jyldyń 7 sáýirindegi jaǵdaı boıynsha birjolǵy tólemdi alýǵa 346 otbasy nıet bildirgen.
Tasqynnan zardap shekken turǵyndar men kásipkerlerdiń materıaldyq zalaldaryn esepteý úshin Aqtóbe oblysynyń ár aýdanynda jeke komıssııalar quryldy. 7 sáýirdegi jaǵdaı boıynsha 2018 ótinish túsip, komıssııa músheleri zalaldy baǵalaý úshin Aqtóbe qalasy men Áıteke bı, Qobda, Muǵaljar, Temir aýdandarynda 1 482 úıdi aralaǵan.
Oıyl aýdanynda sý deńgeıiniń tómendemeýi sebebinen múlikti baǵalaý jumystaryn júrgizý múmkin bolmaı otyr. Keltirilgen zalaldyń tólemderi táýelsiz baǵalaý kompanııasynyń qorytyndylary boıynsha júrgiziledi.
Tirkelmegen múlikti, kóbinese baý-baqsha sharýashylyǵyn baǵalaý úshin bólek mehanızm ázirlenedi.
Aqtóbe oblysynda sý tasqynynan zardap shekkenderge arnalǵan gýmanıtarlyq kómek jınaý ortalyǵy jumys isteıdi. Barlyǵy 10 kún ishinde shamamen 300 tonna (210 tonna azyq-túlik, 80 tonna azyq-túlikke jatpaıtyn taýarlar, 0,2 tonna dári-dármek) jınaldy. Onyń ishinde 215 tonna taýarlar muqtaj turǵyndarǵa taratyldy. Gýmanıtarlyq kómekti zardap shekken aýdandarǵa jetkizýge 8 524 erikti kómektesýde.
Qazirgi ýaqytta Aqtóbe oblysynyń sý tasqynyna qarsy is-sharalar jónindegi jedel shtab jumysyn vıtse-premer Serik Jumanǵarın úılestirip jatyr.
