Aqtóbe oblysyndaǵy Taldysaı aýylynda jańa mektep ashyldy
AQTÓBE. KAZINFORM - 25 qazan – Respýblıka kúni qarsańynda Aqtóbe oblysy Muǵaljar aýdanynyń Taldysaı aýylynda 100 oryndyq jańa mektep ashyldy. Bul týraly oblys ákimdiginiń baspasóz qyzmeti málimdedi.
Mekteptiń ashylý saltanatyna QR Parlamenti Májilisiniń depýtaty Qazybek Álishev, Aqtóbe oblystyq bilim basqarmasy basshysynyń orynbasary Artýr Áýezov, Muǵaljar aýdanynyń ákimi Darhan Ermaǵanbetov jáne aýyl turǵyndary qatysty.
Saltanatty is-sharada Májilis depýtaty Qazybek Álishev, oblystyq bilim basqarmasy basshysynyń orynbasary Artýr Áýezov, aýdan basshysy Darhan Ermaǵanbetov aýyl turǵyndaryn jańa mekteptiń ashylýymen quttyqtady.
Taldysaı jalpy bilim beretin orta mektebinde 24 muǵalim qyzmet etedi, 79 oqýshy bilim alady. Jańa ǵımaratta joǵary synyptarǵa arnalǵan 10 pán kabıneti qarastyrylǵan. Zamanaýı tehnıkalyq quraldarmen tolyqtyryldy. 3 ınteraktıvti taqta, 30 kompıýter jumys isteıdi. Zerthanalary da tolyq jabdyqtalǵan. Sondaı-aq, keń, jaıly sport zal men ashanasy bar.
Mektep aýlasynda sporttyq oıyndarǵa arnalǵan eki alań jáne balalar oıyn alańy salynǵan. Bul oqýshylardyń dene damýyna jáne belsendi ómir saltyn ustanýyna yqpal etedi.
Mekteptiń qurylys jumystaryn «PK Erzat» JShS júrgizdi.
