Aqtóbe oblysyndaǵy sý qoımalarynda tasqynǵa daıyndyq sharalary júrgizilip jatyr
ASTANA. KAZINFORM — Aqtóbe oblysyndaǵy «Qazsýshar» RMK fılıaly Aqtóbe, Qarǵaly jáne Sazdy sý qoımalaryn kóktemgi sý tasqyny kezeńine daıyndaý boıynsha birqatar is-shara júrgizdi. Qazirgi tańda óńirdegi úsh iri sý qoımasynda tasqyn sýdy qabyldaý jáne qaýipsiz ótkizý úshin jetkilikti bos syıymdylyq qamtamasyz etildi. Bul týraly Sý resýrstary jáne ırrıgatsııa mınıstrligi málim etti.
Atap aıtqanda, Aqtóbe sý qoımasynda 58% nemese 141 mln tekshe metr, Qarǵaly sý qoımasynda 68% nemese 192 mln tekshe metr, al Sazdy sý qoımasynda 61%, ıaǵnı 4,5 mln tekshe metrden astam bos syıymdylyq bar.
Buǵan deıin osy úsh nysanda da kópfaktorly keshendi tekserýler júrgizilgen bolatyn. Olardyń qorytyndysy boıynsha qaýipsizdik deklaratsııalary ázirlendi. Sonymen qatar paıdalanýǵa berilgen sátten beri alǵash ret Aqtóbe jáne Sazdy sý qoımalarynda keshendi rekonstrýktsııalaý jumystary júrgizildi.
Tótenshe jaǵdaılardyń aldyn alý maqsatynda barlyq úsh sý qoımasynda Aqtóbe oblysy Tótenshe jaǵdaılar departamentiniń ortalyq basqarý pýltimen biriktirilgen jergilikti habarlaý júıeleri jumys isteıdi. Buǵan qosa, osy júıelerdiń baǵdarlamalyq qamtamasyz etýi jańartylyp, qosymsha radıostantsııalar satyp alyndy.
— Fılıalymyz tasqyn qaýpiniń aldyn alýǵa jáne onyń saldaryn azaıtýǵa baǵyttalǵan keshendi aldyn alý sharalaryn turaqty túrde júrgizip keledi. Strategııalyq mańyzy bar nysandarda táýlik boıy kezekshilik uıymdastyrylyp, rejımdik jáne kúzet sharalary qamtamasyz etilgen. Barlyq sý sharýashylyǵy nysanynda ınertti materıaldar daıyndalǵan, sondaı-aq janar-jaǵarmaı qory bar rezervtik dızel generatorlar qarastyrylǵan. Qazirgi ýaqytta barlyq sý qoımasy shtattyq rejımde jumys istep tur, sý sharýashylyǵy jaǵdaıy turaqty baqylaýda, – dedi «Qazsýshardyń» Aqtóbe oblysyndaǵy fılıal dırektory Rınat Shaýenov.
Eske sala keteıik, buǵan deıin Soltústik Qazaqstan oblysyndaǵy iri sý qoımalary sý tasqynyna daıyn ekenin jazdyq.
