Aqtóbe oblysyndaǵy sporttyq ınfraqurylymdy damytý máselesi jiti baqylaýda
ASTANA. KAZINFORM — Ústel tennısiniń ortalyǵynda ótken kezdesý taqyrybyna Memleket basshysy Qasym-Jomart Toqaevtyń Ulttyq quryltaıdyń tórtinshi otyrysynda sport salasyn damytýǵa qatysty bergen tapsyrmalary arqaý boldy. Óńirdegi sport ınfraqurylymyn, shaǵyn oıyn alańdarynan bastap aýqymdy zamanaýı stadıondarǵa deıingi damytý máselesi talqylandy.
— Sportty damytý — bizdiń jumysymyzdaǵy basym baǵyttardyń biri. Biz buqaralyq sportqa, ásirese jastardy tárbıeleýge jáne salaýatty ómir saltyn qalyptastyrýǵa yqpal etetin fýtbolǵa erekshe nazar aýdaramyz. Prezıdent Ulttyq quryltaıda atap ótkendeı, kásibı jáne buqaralyq sport arasyndaǵy tepe-teńdikti saqtaý mańyzdy. Aqtóbede 35 myń oryndyq jańa zamanaýı stadıon salynady. Bul tek sport alańy ǵana emes, sonymen qatar aımaqtyń mádenı ortalyǵyna aınalady. Múmkindigi shekteýli jandarǵa arnalǵan mamandandyrylǵan keshenniń qurylysy da aıaqtalýǵa jaqyn. Bul — ádil jáne ınklıýzıvti qoǵam qurýǵa qosqan úlesimiz. Óńirde fýtbol sportyn damytýǵa barlyq jaǵdaı jasalǵan. Alaıda, áli de kemshin tustarymyzdy jan-jaqty saralap, búgingi kún talabyna saı etýimiz kerek. Aqtóbe árdaıym óziniń fýtbol mádenıetimen tanymal bolǵan jáne biz osy dástúrdi saqtap, damytýymyz qajet. Sport oblystyń árbir turǵynyna qoljetimdi bolatyndaı etip, jumys isteýdi jalǵastyramyz, — dedi óńir basshysy.
Dene shynyqtyrý jáne sport basqarmasynyń basshysy Meırambek Mahambetov oblysta 1 705 sport nysany jumys isteıtinin, onyń ishinde 373 fýtbol alańy, onyń 218-i aýyldyq jerde ornalasqanyn aıtty. 12 stadıon bar, onyń 6-y — aýdan ortalyqtarynda. Qazir 79 eldi mekenge sport alańdary qajet. Bul maqsatta aldaǵy eki jylda demeýshilik qarajat pen jergilikti bıýdjet esebinen fýtbol alańdarynyń qurylysy júrgizilmek.
Mektep jáne stýdentter lıgalary, sondaı-aq «Dara bala» baǵdarlamasy júzege asyrylyp jatyr. Oblysta sportpen júıeli túrde aınalysatyndardyń sany 43%-ǵa jetti.
Mırambek Mahambetov sondaı-aq halyqaralyq standarttarǵa sáıkes keletin 50 metrlik basseıni, sporttyq jáne kórkem gımnastıkaǵa arnalǵan zaldary, fýtzal, voleıbol jáne basketbol úshin sport keshenin qurý jobasy týraly aıtty. Jyl sońyna qaraı múgedekterge arnalǵan sport kesheniniń qurylysy aıaqtalady. Onda sporttyń 20-dan astam túrin damytý josparlanǵan.
Otyrys aıasynda oblystyq fýtbol federatsııasynyń prezıdenti A.Qaljanov, «Aqtóbe» fýtbol klýbynyń basqarma tóraǵasy S. Shalekenov, Balalar fýtbol jattyqtyrýshysy A.Aqaev jáne Hromtaý aýdanynyń ákimi N.Tileýmuratov baıandama jasady.
Keńes qorytyndysy boıynsha óńirde fýtboldy damytý jónindegi Keńes qurý, «Aqtóbe» fýtbol klýbynyń qala mýzeılerinde buryshtaryn qurý, Hromtaý aýdanynyń aýmaǵynda QR chempıonatynyń fýtboldan ekinshi lıgasyna qatysý úshin fýtbol klýbyn ashý, «Aýla Lıgasy» jáne «Mektep Lıgasy» jobalaryna, stýdentter lıgalaryna jastardy sportqa tartý jobalary qoldaý tapty.
Aıta ketelik Senat tóraǵasy Aqtóbe oblysynyń jastarymen kezdesýde «Adal azamat» tujyrymdamasynyń mańyzy týraly aıtqan edi.