Aqtóbe oblysyndaǵy iri sý qoımasy kúrdeli jóndeýden ótedi
ASTANA. KAZINFORM — «Qazsýshar» RMK Aqtóbe fılıaly men Sý resýrstary jáne ırrıgatsııa mınıstrliginiń Sý sharýashylyǵy komıteti Qarǵaly sý qoımasyn rekonstrýktsııalaý jobasyna arnalǵan jobalaý-smetalyq qujatty ázirleýdi bastady. Bul týraly Sý resýrstary jáne ırııgatsııa mınıstrligi málim etti.
Bul jumys kelesi jyldyń kókteminde aıaqtalady dep josparlanyp otyr. Sý resýrstary jáne ırrıgatsııa mınıstri Nurjan Nurjigitov kásiporynnyń 2025 jyldyń basynan beri atqarǵan jumysy týraly esebin tyńdady. Qurylys-montaj jumystary joba memlekettik saraptamadan ótkennen keıin, 2026 jyly bastalady dep josparlanǵan.
Rekonstrýktsııa barysynda Qarǵaly sý qoımasynyń eskirgen barlyq mehanızmi aýystyrylady, olardyń keıbiri 50 jyldan beri paıdalanylyp keledi. Sonymen qatar gıdrotehnıkalyq nysandarǵa energııa qamtamasyz etý úshin shaǵyn sý elektr stantsııasy ornatylady. Al artyq energııa jergilikti kásipkerlikti jáne kórshi eldi mekenderdi qamtamasyz etý úshin qoldanylady.
– Bul joba Aqtóbe oblysyndaǵy úsh iri sý qoımasyn jańǵyrtý boıynsha keshendi jumysty aıaqtaıdy. Byltyr Іlek ózenindegi Aqtóbe sý qoımasy 36 jyldan keıin alǵash ret jóndeýden ótti, al Sazdy sý qoımasynyń kúrdeli jóndeýi aıaqtalýǵa jaqyn. Qarǵaly sý qoımasynda qazirgi kezde kireberis jol tóselip, bógettiń beti betondalyp jatyr, jaryq shamdary aýystyrylyp, qosymsha beınebaqylaý kameralary ornatylýda. Bul jumystar qarasha aıynyń sońyna deıin aıaqtalady, – dedi «Qazsýshar» RMK Aqtóbe fılıalynyń dırektory Rınat Shaýenov.
Qarǵaly sý qoımasy 1975 jyly paıdalanýǵa berilgen. Onyń syıymdylyǵy 280 mıllıon tekshe metr sýǵa deıin jetedi.
Aıta keteıik, Qazaqstan men Izraıl ózara túsinistik týraly kelisimge keldi.