Aqtóbe oblysyndaǵy Qobda aýdanynda tótenshe jaǵdaı jarııalandy
AQTÓBE. KAZINFORM – Aqtóbe oblysy Qobda aýdanynda jergilikti deńgeıde tótenshe jaǵdaı jarııalandy. Endi komıssııa shyǵyndy esepteıdi.
Aqtóbe oblysy Qobda aýdanynda úılerdi sý basty. Qazirgi kezde qutqarý jumystary jalǵasyp jatyr. Qobda aýdanynyń ákimi Іzgilik Tynymgereev jergilikti deńgeıde tótenshe jaǵdaı jarııalanǵanyn habarlady.
«Qobda aýdandyq tótenshe jaǵdaıdyń aldyn alý jáne joıý jónindegi komıssııasy kezekten tys otyrysyn ótkizdi. Qobda aýdany aýmaǵynda 28 naýryzdan bastap jergilikti aýqymda tótenshe jaǵdaı jarııalandy. Qobda ózeni óz arnasynan shyǵyp, Qobda aýylynyń batys aımaǵynda turǵyn úılerge sý kirdi. Zardap shekken azamattarǵa tıisti kómek beredi. Komıssııa óz jumysyn isteıdi», - dedi Qobda aýdanynyń ákimi Іzgilik Tynymgereev.
Aıta keteıik, búgin túske deıin Qobda aýdanynda 100-den astam adam evakýatsııalandy.
