Aqtóbe oblysyndaǵy 12 adam mert bolǵan jol ishinara 4 jolaqty bolady

ASTANA. KAZINFORM — Aqtóbe oblysynyń ákimi Ashat Shaharov Jibek Joly arnasyndaǵy «Ýáde» baǵdarlamasynda 12 adamnyń ajalyna sebepker bolǵan kólik apaty týraly pikir bildirdi. 

— Bul qaıǵyly oqıǵa bizge aýyr tıdi. Bul ózi respýblıkalyq mańyzy bar jol, táýligine 15-16 myń kólik júredi. Keptelis qaı kezde de baıqalady. Ásirese qysta kóp. Biraq joldy kútip ustaý máselesi basty nazarda. Jol eki jolaqty ǵana bolǵandyqtan qaýipsizdik máselesi qıyndaý bolyp otyr. Endi joldyń sapasyna mán beremiz. «QazAvtoJol» mekemesi osyǵan jaýapty bolǵandyqtan tıisti qarjy bólip, óz jumysyn atqaryp keledi. Polıtsııa departamenti de jumysty kúsheıtedi. Buryn joldaǵy qaýipsizdikke 8 patrýl jumyldyrylǵan bolsa, qazir 20 patrýlge deıin kóbeıttik. Ári qaraı joldardyń qaýipsizdigin beınebaqylaý arqyly, patrýldeý arqyly qamtamasyz etemiz, — dedi ákim.

Aımaq basshysy bul jolda kólik apaty jıi bolatynyn moıyndady.

— Munyń aldynda da kólik apaty az bolǵan joq. Sondyqtan osy joldyń boıyndaǵy 7 ýchaskeni 4 jolaqty etý jumystaryn bastap kettik. Buǵan «QazAvtoJol» jaýapty. Jaqyn arada sonyń 28 shaqyrymy 4 jolaqty ýchaske bolyp ashyldy. Keptelis eń kóp bolatyn tusy — Jazyq eldi mekeni arqyly ótetin temirjolmen qıylysqan jeri. Sol tustan ótkel salyndy. Endi keptelis azaıýy kerek. Qalǵan 6 ýchaskede de osyndaı jumys júrgiziledi. Qazir «QazAvtoJol» qarjylandyrý máselesin sheship jatyr. EPC kelisimshart (jobalaý, smeta daıyndaý, qajetti materıal men jabdyqtar satyp alý, jol salý, montajdaý jumystaryn túgel bir merdigerge júkteıtin kelisim — red.) arqyly sheteldik kompanııalar 3 jylda bitirýge ýaǵdalasyp otyr, — dedi Ashat Shaharov.

Eske salsaq, 23 qazan kúni Aqtóbe oblysyndaǵy Áıteke bı aýdany Belqopa aýylynyń mańynda júk kóligi men jolaýshylar tasymaldaıtyn GAZel soqtyǵysyp, 12 adam qaza bolǵan edi.