Aqtóbe oblysyndaǵy aýyldarda qaıtarylǵan aktıvter esebinen jańa medıtsınalyq mekemeler ashyldy
ASTANA. KAZINFORM — Prezıdenttiń tapsyrmasy boıynsha Aqtóbe oblysynyń aýyldarynda qaıtarylǵan aktıvter qarajaty esebinen jańa medıtsınalyq mekemeler ashyldy. Bul týraly Úkimettiń baspasóz qyzmeti habarlady.
Úkimet azamattardyń ómir súrý sapasyn jaqsartý úshin óńirlerde áleýmettik ınfraqurylymdy damytý jónindegi Memleket basshysynyń tapsyrmalaryn oryndaý boıynsha jumystardy jalǵastyryp jatyr.
Aqtóbe oblysynyń 1,5 myńnan astam turǵyny bar Muǵaljar aýylynda jańa dárigerlik ambýlatorııa ashyldy. Ol Arnaýly memlekettik qordan bólingen qarajatqa jáne «Aýylda densaýlyq saqtaýdy jańǵyrtý» ulttyq jobasyna sáıkes salynǵan.
Medıtsınalyq nysan ambýlatorııalyq qyzmet kórsetedi, zerthanalyq dıagnostıka men skrınıngter júrgizedi. Jobanyń jalpy quny – 300 mln teńge. Ambýlatorııa táýligine 45 kelýshige eseptelgen.
Sondaı-aq óńirde buǵan deıin Arnaýly memlekettik qor qarajatyna salynǵan Baıǵanın aýdanynyń Noǵaıty aýylynda kúnine 40 kelýshige eseptelgen feldsherlik-akýsherlik pýnkt (quny – 190 mln teńge) jáne qýaty táýligine 25 kelýshige arnalǵan Yrǵyz aýdanynyń Jarma aýylyndaǵy medıtsınalyq pýnkt (quny – 145 mln teńge) paıdalanýǵa berilgen bolatyn.
5 myńǵa jýyq adam turatyn Alǵa aýdany Marjanbulaq aýylynda dárigerlik ambýlatorııanyń qurylysy aıaqtalýǵa jaqyn.
Jalpy Aqtóbe oblysynda qaıtarylǵan aktıvter qarajaty esebinen qurylǵan Arnaýly memlekettik qordan aýyldyq densaýlyq saqtaý salasynda barlyǵy 11 joba júzege asyrylyp jatyr. Búgingi tańda úsh nysan paıdalanýǵa berildi, segiz nysannyń qurylysy jalǵasyp jatyr.
Aıta keteıik, Ulytaý oblysynda qaıtarylǵan aktıvter qarajaty esebinen 7 densaýlyq saqtaý nysany salyndy.
Mańǵystaý oblysynda ortalyq aýrýhana qaıtarylǵan aktıvter esebinen jóndelip jatyr.
Qaraǵandy oblysynda qaıtarylǵan aktıvter esebinen jańa medıtsınalyq pýnkt ashyldy.
Aqmola oblysynda qaıtarylǵan aktıvter esebinen ambýlatorııa salynyp jatyr.