Aqtóbe oblysynda jumysqa ornalastyrý kórsetkishi eń tómen – Úkimet basshysy
ASTANA. KAZINFORM – Búgin Úkimet otyrysynda Premer-Mınıstr Oljas Bektenov Aqtóbe oblysynda jumysqa ornalastyrý kórsetkishi eń tómen ekendigin aıtty.
«Ashat Berleshuly, qazirgi ýaqytta sizderde jumysqa ornalastyrý kórsetishi eń tómen. Jospardyń 30 paıyzy ǵana. Júrgizilip jatqan sharalar týraly baıandańyz», - dedi Úkimet basshysy Aqtóbe oblysynyń ákimi Ashat Shaharovqa.
Óńir basshysy kórsetkishke qol jetkize almaı otyrǵandyqtaryn moıyndap, biraq ony jyldyń sońyna deıin sheshetinin aıtty.
«Búginge 18 400 adam jumysqa ornalastyryldy. Jospar boıynsha 62 528 adam. Qazirgi tańda kesteden artta qalýshylyq bolyp otyr. Alaıda josparly kórsetkishterge jetýdiń birqatar tetigi bar. Osy jyldyń sońyna deıin qosymsha 43 myńnan astam adam kelesi tetikter arqyly jumysqa ornalasatyn bolady: bos jumys oryndaryna – 21 300 adam, «10 myń halyqqa 100 jumys orny» aıasynda 12 400 adam, sýbsıdııalanatyn jumys oryndaryna – 6 200 adam, salalyq tujyrymdamalar ulttyq jobalary boıynsha – 3 700 adam. Osylaısha, jyldyq jospar tolyq kólemde oryndalady», - dedi ol.
