Túnde birneshe oblysta jolda qalǵan kólikterge kómek kórsetilip, 39 adam evakýatsııalandy - TJM
ASTANA. KAZINFORM – Bul týraly QR Tótenshe jaǵdaılar mınıstrliginiń bapasóz qyzmetinen málim boldy.
Baspasóz qyzmetiniń málimetterine qaraǵanda, búgin 112 pýltine Aqtóbe oblysy Áıteke bı aýdanynan birneshe shaqyrym jerde jabyq jolda avtobýs turǵany týraly habarlama kelip túsken.
- Dereý shaqyrtý ornyna jónelgen qutqarýshylar avtobýsta 39 jolaýshy bar ekenin anyqtady. TJM qyzmetkerleri barlyǵyn Qarabutaq aýylyna evakýatsııalady. Oqıǵa saldarynan eshkim zardap shekken joq, - delingen habarlamada.
Sondaı-aq Aqtóbe oblysynyń Hromtaý aýdanynda birneshe kólik qar qursaýynda qalǵan. Qutqarýshylar jáne QR TJM 20982 áskerı bóliminiń qyzmetkerleri respýblıkalyq mańyzy bar «Samara-Shymkent» jáne «Hromtaý-Badamsha» tas jolynan 2 júk kóligin, 1 jeńil kólikti tazartylǵan jolǵa súırep shyǵardy.
Al Aqtóbe oblysynyń Qobda aýdanyndaǵy «Shubarqudyq-Oıl-Qobda-Sol-Iletsk» jáne «Samara-Shymkent» 640 shaqyrym avtojoldarynda qutqarýshylar qar qursaýynda qalǵan jeńil avtokólikterdi arnaıy tehnıkanyń kómegimen súırep shyǵardy.
Alǵa aýdanynda oblystyq mańyzy bar «Aqtóbe-Astrahan» avtojolynyń ýchaskesinde qutqarýshylar kúshimen úsh adam qutqaryldy.
BQO Báıterek aýdanynda, TJM ókilderi «Oral-Saratov» avtojolynda qar qursaýynda qalǵan jeńil avtokóliktiń júrgizýshisi men jolaýshysyna kómekke keldi.
Osyǵan deıin Tótenshe jaǵdaılar mınıstrliginiń qyzmetkerleri 5 balyqshyny qutqarǵany týraly jazǵan edik.