Aqtóbe oblysynda jergilikti mańyzy bar avtojoldardyń úlesi 82%-ǵa jetkizilmek

ASTANA. KAZINFORM – Aqtóbe oblysynyń ákimi Ashat Shaharov jol salasyna qatysty júrgizilip jatqan jumystar týraly baıandap, óńirdiń tranzıttik mańyzyn atap ótti.

- Aqtóbe oblysy geografııalyq turǵydan alǵanda úlken tranzıttik áleýetke ıe. Sondyqtan jol sapasy – turǵyndardyń únemi nazarynda, – dedi oblys ákimi.

Onyń aıtýynsha, bıyl jol salasyndaǵy 186 jobaǵa shamamen 68 mlrd teńge qarjy baǵyttalǵan.

- Bul qarajatqa jergilikti mańyzy bar joldar, qalalyq jáne aýyldarǵa kireberis, sondaı-aq aýylishilik joldar jóndelip jatyr, – dedi Shaharov.

Ákimniń sózinshe, jyl sońyna deıin normatıvtik jaǵdaıdaǵy jergilikti mańyzy bar avtojoldardyń úlesi 82%-ǵa jetkizilmek.

- Bıyl óńirde jalpy 565 shaqyrym jol jabyndysy salyndy, onyń ishinde 371,8 shaqyrymy – asfalt. Aqtóbe qalasy da nazardan tys qalmaıdy. Jyl sońyna deıin 35 joba nemese 67 shaqyrym kóshe-jelisi normatıvke keltiriledi. Bul – oblys ortalyǵyndaǵy 150-den astam kósheni qamtıdy, – dedi ol.

Sondaı-aq halyqaralyq mańyzy bar avtojoldaǵy qaıta jańǵyrtý jumystaryna toqtaldy.

- Aqtóbe-Ulǵaısyn baǵyty boıynsha 262 shaqyrym jolda jumystar júrgizilip jatyr. Bıyl Aqtóbe-Hromtaý ýchaskesinde 28 shaqyrym jóndelip, jańa kópirmen birge 4 jolaqty joldyń eki jolaǵy qozǵalysqa ashyldy. Sonymen qatar «Qandyaǵash–Embi–Shalqar–Yrǵyz» avtojolynda ortasha jóndeý jalǵasyp jatyr. Bıyl josparlanǵan 110 shaqyrym tolyq aıaqtalyp, paıdalanýǵa berildi, – dedi Ashat Shaharov.

Aıta keteıik, bıyl respýblıkalyq mańyzy bar avtojoldarda jol qozǵalysy qaýipsizdigin kúsheıtý sharalary iske asyrylyp jatyr. Negizgi nazar trassalardy jańǵyrtýǵa jáne jaıaý júrginshilerdiń qaýipsizdigin qamtamasyz etýge baǵyttalady.

Buǵan deıin Aqtóbe oblysynyń ekonomıkasyna 892 mlrd teńge ınvestıtsııa salynǵanyn jazǵanbyz.