Aqtóbe oblysynda jergilikti grant ıegerleri anyqtaldy
ASTANA. KAZINFORM — Q.Jubanov atyndaǵy Aqtóbe óńirlik ýnıversıtetinde 16–18 tamyz kúnderi talapkerlerden ótinishter qabyldandy, dep habarlaıdy oblys ákimdiginiń baspasóz qyzmeti.
Búgin oblys ákimi Ashat Shaharovtyń tóraǵalyǵymen jergilikti bıýdjet qarajaty esebinen joǵary bilimdi mamandardy daıarlaýǵa memlekettik bilim berý tapsyrysyn ornalastyrý jónindegi konkýrstyq komıssııanyń bilim salasy boıynsha sońǵy otyrysy ótti. Komıssııa músheleri 2025–2026 oqý jylyna bakalavrıat deńgeıinde bilim alýǵa bólingen 40 grant boıynsha talapkerlerdiń ótinishterin qarap, onyń ıegerlerin anyqtady.
Otyrysta baıandama jasaǵan oblystyq bilim basqarmasynyń basshysy Bulbul Kúzembaeva grantqa qabyldaý 5 sala, 24 mamandyq boıynsha júrgizilgenin málimdedi. Konkýrsqa barlyǵy 59 ótinish tústi, onyń ishinde 58-i — Aqtóbe oblysynyń mektep jáne kolledj túlekteri, bireýi — Atyraý oblysynan.
— Grant ıegerleri 2025 jylǵy UBT nátıjelerine sáıkes anyqtaldy, al ball teń bolǵan jaǵdaıda oqý úlgerimi men áleýmettik jaǵdaı eskerildi. Nátıjesinde «Hımııa páni muǵalimi» 3 orynǵa — 14 ótinish, «Kórkemeńbek muǵalimi» 2 orynǵa — 13 ótinish, «Gıdromelıoratsııa» 2 orynǵa — 10 ótinish, «Veterınarııa» 2 orynǵa — 7 ótinish, «Balyq sharýashylyǵy» 1 orynǵa — 5 ótinish túsken, bul mamandyqtar boıynsha básekelestik joǵary boldy, — deıdi basqarma basshysy.
Al matematıka, fızıka, rejıssýra, stsenografııa, oryndaýshylyq ónerdiń birqatar baǵyttary jáne ınjenerlik mamandyqtarǵa túsýge nıet bildirgen úmitkerler bolmaǵan. Osyǵan baılanysty 16 oryn bos qaldy. Komıssııa múshelerine atalǵan bos granttardy suranysy joǵary mamandyqtarǵa qaıta bólý usynyldy. Bólinis mynadaı bolyp bekitildi: hımııa — qosymsha 3 oryn, gıdromelıoratsııa — qosymsha 6 oryn, veterınarııa — qosymsha 4 oryn, balyq sharýashylyǵy — qosymsha 2 oryn, avtomattandyrý — qosymsha 1 oryn.
Komıssııa sheshimimen 2025–2026 oqý jylyna jergilikti bıýdjet esebinen qarjylandyrylatyn grant ıegerleriniń tizimi bekitilip, kópshilikke jarııalanady. Sonymen qatar, qabyldanǵan stýdentterdiń oqý úlgerimine turaqty monıtorıng júrgizilip, bitirýshilerdiń eńbekke ornalasýy baqylaýǵa alynbaq.
Grant ıegerleriniń tizimin kórý úshin siltemege ótý qajet.
Budan buryn bıyl da 3 myńǵa jýyq jas bilim grantynan bas tartýy múmkin ekeni belgili boldy.