Aqtóbede jeke balabaqshadaǵy oqıǵadan soń baqylaý kúsheıtildi
Aqtóbe oblysy ákimi baspasóz qyzmetiniń habarlaýynsha, «Amır» jeke balabaqshasynda bolǵan oqıǵadan soń óńir basshysy Ashat Shaharov jıyn ótkizip, jaýapty basshylarǵa naqty tapsyrmalar berdi. Oblys basshysy tárbıelenýshilerge nemquraıly qaraǵan balabaqshalarǵa qatysty sharalardy qatańdatý týraly talap qoıdy, Kazinform.
- Balabaqshalardyń ishinde beınekameralar ornatylyp, ol barlyq ata-anaǵa qoljetimdi bolýy kerek. Ekinshiden, baqylaýdyń tsıfrlyq júıelerin qoldana otyryp, balabaqshaǵa kelip-ketken adamdardy qadaǵalaýdy retteý qajet. Eger balabaqsha tárbıelenýshilerine nemquraıly qaraý faktileri anyqtalsa, onda mekemeniń jumysy dereý toqtatylýy kerek. Basshylar jazalanýy tıis, - dedi Ashat Shaharov.
Aqtóbe oblystyq bilim basqarmasyna balabaqshalardaǵy zańbuzýshylyqtarǵa jedel den qoıýdy qamtamasyz etý mindetteldi.
- Qazirgi ýaqytta Sizdiń tarapyńyzdan jedel áreket etý joq. Uzaq ýaqyt oılanasyz, tolǵanasyz. Ózińiz nemese orynbasaryńyz osyndaı oqıǵa bolǵanda birden sol kúni sol jerge baryp, tapsyrmalar berip, halyqqa aqparat jetkizýi kerek edi. Árbir jaǵdaıǵa jaýap tez berilýi kerek. Sondaı-aq, aldyn-ala jumysty kúsheıtip, táýekelderdi anyqtaý shart. Polıtsııa departamentimen birlesip, balabaqshalardy tekserip shyǵyńyzdar, osyndaı faktiler anyqtalǵan jaǵdaıda shuǵyl sheshim qabyldańyz», - dedi oblys ákimi bilim basqarmasynyń basshysy Jaıyq Sultanǵa.
Óńir basshysy salalyq basqarma ókilderine Ahýaldyq ortalyq bazasynda balalarǵa qatysty máselelerge baılanysty aryz-shaǵym túsiretin senim telefonyn iske qosýdy tapsyrdy.
Eske salsaq, balasynyń denesi kógergen, jyryp ketken, jatyn orny men tamaqtaný bólmesinde sanıtarııalyq talap saqtalmaǵan dep bir top ata-ana shaǵymdandy. Keıin jeke balabaqshaǵa memlekettik tapsyrys berý toqtatylyp, quryltaıshysy onyń jumysyn toqtatýǵa májbúr boldy.
