Aqtóbe oblysynda jańa oqý jylynda 6 mektep ashyldy
Jańa bilim oshaqtarynyń beseýi — «Keleshek mektepteri» ulttyq jobasy aıasynda salyndy. Bir mektep — Muǵaljar aýdany Kótibar batyr aýylynda esigin aıqara ashty.
Memleket basshysynyń bastamasymen qolǵa alynǵan «Keleshek mektepteri» ulttyq jobasy aıasynda oblys ortalyǵyndaǵy Altyn Orda yqsham aýdanynda salynǵan 2000 oryndyq jáne «Saıajaı-1» turǵyn alabyndaǵy 300 oryndyq mektep halyq ıgiligine berildi.
Atalǵan oqý ordalaryna búgin Aqtóbe oblysynyń ákimi Ashat Shaharov baryp, ustazdar men oqýshylar qaýymyn jańa mektepte jańa oqý jylynyń bastalýymen quttyqtady. Óńir basshysy balalarǵa jaıly ári zamanaýı orta qalyptastyrýdyń mańyzdylyǵyn atap ótti.
2000 oryndyq mektepte STEM-zerthana, robototehnıka, fızıka, hımııa, bıologııa kabınetteri, sondaı-aq bastaýysh synyptarǵa arnalǵan arnaıy kabınetter jabdyqtalǵan. Balalardyń jan-jaqty damýy úshin sheberhanalar, mýzyka, horeografııa, alǵashqy áskerı daıyndyq kabınetteri, psıhologııalyq jáne áleýmettik-pedagogıkalyq qyzmetter, kásibı baǵdar jáne zań kabınetteri ashyldy. Eki úlken jáne eki shaǵyn sport zal, 410 oryndyq ashana, 444 oryndyq akt zaly jumys isteıdi. Sonymen qatar, oqý ordasynda 20 myńnan astam kitap qory bar kitaphana jáne oqý zaly bar. Al balalarǵa konkýrs arqyly tańdalynǵan 100-den astam pedagog pedagog bilim men tálim beredi.
— Dene shynyqtyrý pániniń muǵalimimin. Qudaıbergen Jubanov atyndaǵy Aqtóbe óńirlik ýnıversıtetin támamdap, jumysqa ornalastym. Alǵashqy jumys ornymnyń osyndaı jańa ári zaman talabyna saı mektepte bastalǵanyna qýanyshtymyn. Prezıdent qoldaýymen óńirde birqatar jobalar júzege asyrylyp keledi. Jastarǵa orasan zor jaǵdaı jasalýda, — dedi Álı Qulbaraq.
Al «Saıajaı-1» turǵyn alabyndaǵy 300 oryndyq mektep halyq kópten kútken nysan. Munda da pedagogter men oqýshylarǵa barlyq jaǵdaı bar. Shyǵarmashylyq jáne tájirıbelik turǵyda damýǵa erekshe kóńil bólingen. Jańa mektep tabaldyryǵyn 503 oqýshy attap, olardyń bilim alýy men tárbıesi 40 bilikti pedagogke senip tapsyryldy.
Óńir basshysy ár kabınetpen tanysyp, oqýshylarmen sóılesti. Ata-analar dán rıza. «Balalarymyz endi alysqa qatynap oqymaıdy» deıdi.
— Birneshe jyl buryn osy turǵyn alapqa mektep suradyq. Keıin «Keleshek mektepteri» ulttyq jobasy aıasyndv mektep salynatyndyǵy týraly habardy estigende, qýandyq. Mine, búgin ıgiligin kórip otyrmyz. Mektep tek bilim alatyn oryn emes, ol — rýhanı ortalyq bolýy kerek. Biz árqashan halyq bolyp qoldaımyz, — dep qala turǵyny Estaı Jaılybaı áserimen bólisti.
— Jańa mektep, jańa oqý jyly barshańyzǵa qutty bolsyn. Memleket basshysynyń tapsyrmasymen, mine, osyndaı záýlim oqý ordasy salyndy. «Keleshek mektepteri» dep atalady. Aralap, qarap shyqtym. Jańa oqý quraldary, yńǵaıly jabdyqtar, zaman talabyna saı kabınetter, bári — de balalardyń básekege qabiletti bolýy úshin jasaldy. Bul mektepti bitirgen oqýshy daıyn maman bolyp shyǵatyny sózsiz. Pedagogterdiń ózi irikteýden ótkizilip, jumysqa ornalasty. Ata-analar endi mektep ujymymen birlese jumys isteý kerek, — dep atap ótti Ashat Shaharov.
Óńirde bıyl 190 myńǵa jýyq bala mektepke bardy. Bul byltyrǵy jylmen salystyrǵanda 5 myń oqýshyǵa artyq. Oqýshylar sanynyń turaqty ósýine jyl saıyn dúnıege keletin 19 myńǵa jýyq sábı men kóshi-qon úderisteri tikeleı yqpal etip otyr. Osy sebepti de jańa mektepterge degen suranys artyp keledi.
Jalpy ulttyq joba aıasynda oblysta 14 mektep salý josparlanǵan. Onyń ekeýi kóktemde paıdalanýǵa berilse, Bilim kúninde 5 mektep esigin aıqara ashty. Jyl sońyna deıin taǵy 7 mekteptiń qurylysy aıaqtalmaq.
