Aqtóbe oblysynda jańa áskerı bólim ashyldy
ASTANA. KAZINFORM — Qorǵanys mınıstri Aqtóbe oblysynda jańa áskerı ınfraqurylym nysandaryn ashty, dep habarlaıdy vedomstvonyń baspasóz qyzmeti.
QRQorǵanys mınıstri avıatsııa general-leıtenanty Daýren Qosanov Aqtóbe oblysyna jumys saparymen bardy. Sapar aıasynda qorǵanys vedomstvosynyń basshysy óńirdegi áskerı ınfraqurylymnyń damýymen tanysyp, jańa nysandardyń ashylý rásimine jáne eldiń qorǵanys qabiletin odan ári nyǵaıtýǵa baǵyttalǵan birqatar is-sharaǵa qatysty.
Jumys saparynyń negizgi oqıǵasy Jem qalasynda jańa áskerı bólimniń ashylýy boldy. Áskerı quramany qurý óńirdiń áskerı qaýipsizdigin nyǵaıtý jáne Qarýly kúshterdiń jedel múmkindikterin arttyrý jónindegi mindetterge sáıkes júzege asyryldy.
Qorǵanys mınıstri ákimshilik-shtab keshenin, kazarma qoryn, ashanany, mádenı-demalys ortalyǵyn jáne áskerı qalashyqtyń ózge de nysandaryn aralap kórdi.
Qorǵanys vedomstvosynyń basshysyna jeke quramdy ornalastyrý jaǵdaılary, qyzmet ótkerýdi uıymdastyrý, áskerı qyzmetshilerdi tamaqtandyrý men bos ýaqytyn uıymdastyrý, sondaı-aq áskerı qyzmetti jaıly ótkerýge jáne mindetterdi sapaly oryndaýǵa qolaıly jaǵdaı jasaıtyn zamanaýı ınfraqurylymdyq nysandar tanystyryldy.
Qorǵanys mınıstri zamanaýı áskerı ınfraqurylymdy damytý Qarýly kúshterdi jańǵyrtýdyń basym baǵyttarynyń biri ekenin atap ótti.
Áskerı qalashyqtardy kezeń-kezeńmen jańǵyrtý, jańa nysandar salý jáne qyzmet jaǵdaılaryn jaqsartý áskerlerdiń jaýyngerlik ázirligin arttyrýǵa, jeke quramdy daıarlaý tıimdiligin kúsheıtýge jáne memlekettiń qorǵanys áleýetin nyǵaıtýǵa yqpal etedi.
Buǵan deıin habarlanǵandaı, merzimdi áskerı qyzmetten ótpegen azamattar áskerı mamandyq alyp, áskerı bılet ıelene alady.
