Aqtóbe oblysynda úsh aýysymdy jáne apatty mektep máselesi qashan sheshiledi

ASTANA. KAZINFORM — Bıyl oblysta 10 jańa mektep paıdalanýǵa berildi. Óńirdegi bilim jáne densaýlyq salasynyń damýy týraly ákim Ashat Shaharov aıtyp berdi.

— Áleýmettik salaǵa kelsek, bizdiń óńirdiń damýyndaǵy basty baǵyttar — bilim jáne densaýlyq saqtaý salasy. Ásirese qazir sapaly bilim berýdi uıymdastyrý basty basymdyq. Osy oraıda bıylǵy jyly 8 jańa mektep paıdalanýǵa berildi. Jyl sońyna deıin taǵy 2 mektep qurylysyn aıaqtaý josparlap otyrmyz. Sondaı-aq, aldaǵy jyldary 11,4 myń oqýshyǵa arnalǵan 14 jaıly mektep qurylysyn aıaqtap, iske qosamyz. Odan bólek, úsh aýysymdy, apatty mektepter máselesin sheshý maqsatynda keler jyly 16,4 myń oqýshyǵa arnalǵan 27 mektep salynady. Sondaı-aq, 300 oryndyq balabaqshanyń qurylysy bastalady, — dedi Ashat Shaharov óńirdiń áleýmettik-ekonomıkalyq damýy týraly esep bere turyp.

Odan ári óńir basshysy densaýlyq saqtaý salasyndaǵy jumysqa toqtaldy. 

— Medıtsınalyq qyzmetterdiń sapasyn arttyrý úshin «Aýyldyq densaýlyq saqtaýdy jańǵyrtý» ulttyq jobasy aıasynda óńirde 29 joba iske asyrylýda. Qazir 12 nysan paıdalanýǵa berildi, jyl sońyna deıin taǵy 6 nysan iske qosylady, — dep tolyqtyrdy Aqtóbe oblysynyń ákimi.

Buǵan deıin atalǵan oblystaǵy 24 aýyl keler jyly gazben qamtylatyny habarlandy.

Aıta keteıik, aldaǵy jyly Aqtóbe óńiri 1 trln teńge ınvestıtsııa tartýdy josparlap otyr.