Aqtóbe oblysynda TJM qutqarýshylary joǵalǵan balany táýlik boıy izdep jatyr
ASTANA. KAZINFORM — Mártók aýdany, Elek ózeniniń mańynda, Saryjar aýylynan bes shaqyrym jerde, 2016 jyly týǵan balanyń turǵan jerin anyqtaý boıynsha izdestirý jumystary júrgizilýde. Habarlama túskennen keıingi alǵashqy saǵattardan bastap izdestirý is-sharalaryna TJM áýe kemesi dereý tartyldy. Bul týraly TJM málim etti.
Avıatsııa jedel kelip, ózen arnasynyń uzyn bólikteri men irgeles jerdi qosa alǵanda, edáýir aýmaqty ushyp shyqty, bul qysqa merzim ishinde úlken izdeý alańdaryn qamtýǵa múmkindik berdi.
— Іzdestirýge 370-ke jýyq jeke quram, 60-tan astam tehnıka, 11 júzý quraly, 5 ushqyshsyz ushý apparaty jumyldyrylǵan. Sonymen qatar kınologııalyq eseptoptar, TJM psıhologtary men medıtsına qyzmetkerleri tartylǵan. Іzdestirý jumystaryna budan bólek polıtsııa qyzmetkerleri, TJM áskerı bólimderiniń áskerı qyzmetshileri men Ulttyq ulan, jergilikti atqarýshy organdardyń ókilderi, eriktiler jáne jergilikti turǵyndar qatysyp jatyr, — delingen habarlamada.
Jumys bastalǵaly TJM súńgýirleri 70-ten asa ret sýǵa túsip, 4,8 shaqyrymǵa jýyq akvatorııany tekserdi. Júzý quraldaryn qoldaný arqyly ózen arnasynyń 30-dan astam shaqyrylym tekserildi. Jaıaý toptar jaǵalaý boıymen shamamen 45 shaqyrym júrip ótti.
Іzdestirý jumystary táýlik boıy júrgizilip, kúndiz de, túnde de toqtaýsyz jalǵasýda. Aıtarlyqtaı qıyndyqtar ózenniń kúrdeli geografııasymen baılanysty: ırek arna, keri aǵystar men quıyndar bar ýchaskeler, qalyń ósimdikter basqan jetýi qıyn aımaqtar jáne batpaqty jaǵalaýlar. Qosymsha qıyndyq retinde sýdyń laılyǵy men kórinýdiń óte tómen bolýy súńgýirlerdiń jumysyn edáýir qıyndatady.
Oqıǵa ornynda TJM jedel shtaby óristetildi. Jumys júrgizý aımaǵynda TJD men DP komandalyq-shtabtyq mashınalary jumys isteıdi, spýtnıktik termınaldar (Starlink, Iridium) arqyly turaqty baılanys qamtamasyz etilgen.
Eske sala keteıik, Aqtóbede 10 jastaǵy Mansur Samatov úıinen 29 naýryz kúni úıinen shyǵyp ketip, keri oralmaǵan edi. Balany izdeý jumystary sol kúnnen beri jalǵasyp jatyr.
