Aqtóbe oblysynda tasqynnan zardap shekkenderge úsh kompanııa 28 mlrd teńge bóledi
AQTÓBE. KAZINFORM – Vıtse-premer Qanat Bozymbaev, BI Group holdınginiń aktsıoneri jáne dırektorlar keńesiniń tóraǵasy Aıdyn Rahymbaev, «Vernyı Kapıtal» AQ bas dırektorynyń birinshi orynbasary Dáýren Ótemuratov pen «Qazhrom» TUK» AQ (ERG kompanııalar toby) bas dırektory Sergeı Prokopev Aqtóbe oblysynda boldy.
Aqtóbe oblysynyń ákimi Ashat Shaharovtyń aıtýynsha, óńirde jaǵdaı turaqtandy, ózenderdegi sý deńgeıi tómendep keledi. Yrǵyz, Muǵaljar, Temir, Oıyl, Qobda, Áıteke bı aýdandarynda jáne Aqtóbede jergilikti deńgeıde TJ rejımi áli de saqtalýda.
Barlyǵy 4 600 turǵyn úı apattan zardap shekti. Búgingi tańda 1 myńnan astam úı men saıajaı tekserilip, onyń 641-i jóndeýge jatpaıtyny anyqtaldy.
BI Group holdıngi Áıteke bı jáne Muǵaljar aýdandarynda 40-qa jýyq úı salýǵa kiristi. Sondaı-aq kompanııa Aqtóbe qalasynda baspanasyz qalǵandarǵa 34 páter satyp alady. Jumysty tamyzdyń ortasynda aıaqtaý josparlanýda. Bul maqsatqa kompanııa 2 mlrd teńge bóldi.
«Sý tasqyny kezinde apatqa qarsy kúreske barlyǵy 5 mlrd teńge bóldik, onyń 2 mlrd-y Aqtóbe oblysyna baǵyttalady», - dedi Aıdyn Rahymbaev.
Qobda aýdanynda qosymsha 150 turǵyn úı salýǵa, sondaı-aq Aqtóbe qalasynda jáne oblys aýdandarda 269 páter men úı satyp alýǵa «Vernyı Kapıtal» kompanııasynyń negizin qalaýshy Bolat Ótemuratovtyń jeke qory demeýshilik etpek.
«Jalpy Aqtóbe oblysyna 11,5 mlrd teńge bólinedi. Ótken aptada Áıteke bı aýdanynyń Júrgenov aýylynda jańa úıler satyp alyna bastady. Alǵashqy bes úı zardap shekkenderge berildi. Osy aptada taǵy 15 úıdi tapsyrý josparlanýda», - dedi Dáýren Ótemuratov.
Óz kezeginde ERG kompanııalar toby óńirge shamamen 15 mlrd teńge bóledi.
«ERG barlyq kásiporyny sý tasqynynyń saldaryn joıý úshin qoldan kelgenshe kómek kórsetedi. Kompanııalar tobynyń aktsıonerleri qalpyna keltirý jumystary úshin shamamen 40 mlrd teńge bóldi. Aqtóbe oblysynda bizdiń kompanııalar tótenshe jaǵdaıdyń alǵashqy kúnderinen bastap jergilikti atqarýshy organdarmen belsendi qyzmet etýde. Biz tehnıka berip jatyrmyz, sonymen qatar volonterlerimiz de belsendi kómektesýde», - dedi Sergeı Prokopev.
Vıtse-premer Qanat Bozymbaev halyqpen kezdesý barysynda óńirdegi jalpy ahýal, zalaldy óteý jáne turǵyn úılerdi qalpyna keltirý týraly aıtyp berdi.
Atap aıtqanda, jalpy somasy 877 mln teńge bolatyn 100 AEK mólsherindegi alǵashqy birjolǵy kómek 2 700 otbasyna kórsetildi. Joǵalǵan nemese búlingen múlikti óteý sheńberinde 344 otbasyna 600 mln teńge tólendi. Qalǵan zardap shekkenderge qarajat jaqyn arada tolyq tólenedi.
«Sý tasqynynan keltirilgen zalaldy joıý úshin jergilikti bıýdjetten 7,8 mlrd teńge qarastyrylǵan. Alaıda turǵyn úı qorynan basqa 136 shaqyrym joldy, 15 kópir men 23 áleýmettik nysandy qalpyna keltirýimiz qajet. Elimizge belgili iri kásipkerler kómek qolyn sozdy. Biz Aqtóbe oblysyna úsh kompanııany bekitemiz. BI Group, «Vernyı Kapıtal» jáne «Qazhrom» birge óńirge turǵyn úı salýǵa, satyp alýǵa jáne ınfraqurylymdy qalpyna keltirýge shamamen 28 mlrd teńge baǵyttaıdy. Turǵyn úı salý úshin ákimdik 26 merdigerdi anyqtady, qazirgi ýaqytta 63 úıdiń qurylysy júrip jatyr», - dedi vıtse-premer Qanat Bozymbaev.
Yrǵyz aýdanynda 54 úı salýǵa taǵy 1,5 mlrd teńge «Qazaqstan halqyna» qorynan bólinedi.