Aqtóbe oblysynda taǵy eki aýyldyń turǵyndary evakýatsııalanady
AQTÓBE. KAZINFORM - Oıyl aýdanynyń Kóptoǵaı, Yrǵyz aýdanynyń Nura aýyldarynda turǵyndardy evakýatsııalaýǵa sheshim qabyldandy.
Aqtóbe oblysy ákiminiń baspasóz qyzmetiniń habarlaýynsha, Oıyl aýdany Kóptoǵaı aýylynyń turǵyndaryn evakýatsııalaýǵa sheshim qabyldandy. Buǵan deıin aýyldyń er azamattary qalyp, jaǵany bekitý jumystaryn júrgizgen bolatyn. Barlyǵy 3 myń qum toly qap tóseldi.
- Kóptoǵaı aýyly aýdan ortalyǵynan 36 shaqyrym jerde ornalasqan. Búginde aýylda 839 adam tursa, onyń 117-i bala. 1963 jyly bıiktigi 2 metr, uzyndyǵy 3 shaqyrym jáne eni 3 metr bolatyn bóget salynǵan. Búgingi kúni atalǵan bóget sýdy ustap tur. Alaıda sýdyń deńgeıi bógettiń bıiktigimen teńesken, eldimekendi sý basý qaýpi týyndap otyr. Jergilikti turǵyndar úshin qaýip-qaterdi eskere otyryp, Kóptoǵaı aýylynyń turǵyndaryn evakýatsııalaý týraly sheshim qabyldandy. Evakýatsııalanǵandardy ornalastyrý úshin aýdan ortalyǵynda ornalasqan dene shynyqtyrý-saýyqtyrý kesheni men Oıyl agrarlyq kolledji daıyndaldy,- dep habarlady Aqtóbe oblysy ákiminiń baspasóz qyzmeti.
Turǵyndardy tasymaldaýǵa 5 ÝAZ avtokóligi, 1 jol talǵamaıtyn jáne 10 jeńil kólik bólingen. Mundaǵy evakýatsııalaýdy Oıyl aýdanynyń ákimi jáne oblystyq tótenshe jaǵdaılar departamentiniń bastyǵy basqarady.
Sonymen birge Yrǵyz aýdanynyń Nura aýylynda da evakýtsııalaý júrgiziledi. Munda 8 kólik jiberilgen. Alaıda jol qatynasy qıyndap, bir kólik aýylǵa jetpeı baptaqqa batyp qaldy. Aýdan ákimi Nurlan Qyzbergenovtiń aıtýynsha, súırep shyǵarý úshin traktor jiberilgen. Nura aýylynda 112 úı, 691 adam bar.
