Aqtóbe oblysynda taǵy bir aýyl ishimdikten bas tartty
ASTANA. KAZINFORM — Qazir Aqtóbe oblysy boıynsha 40 eldi meken alkogol ónimderin tutynýdan bas tartý bastamasyn qoldap otyr, dep habarlaıdy ІІM baspasóz qyzmeti.
20 mamyrda Áıteke bı aýdanyna qarasty Qııaqty aýylynda jergilikti atqarýshy organdardyń, qoǵam ókilderiniń jáne polıtsııa qyzmetkerleriniń qatysýymen profılaktıkalyq kezdesý ótti.
Іs-sharaǵa aýyl ákimi, aýyl aqsaqaldary, polıtsııa qyzmetkerleri men turǵyndar qatysty. Kezdesý barysynda quqyq buzýshylyqtyń aldyn alý, salaýatty ómir saltyn nasıhattaý, qoǵamdyq tártipti nyǵaıtý jáne aýyldaǵy turaqty áleýmettik ahýaldy saqtaý máseleleri talqylandy.
Jıyn qorytyndysy boıynsha Qııaqty aýylynyń turǵyndary alkogol ónimderin satýdan jáne tutynýdan bas tartý bastamasyn biraýyzdan qoldady.
— Aýylda 62 úı ornalasqan, halyq sany — 207 adam. Sońǵy bes jyl ishinde eldi meken aýmaǵynda birde-bir qylmys pen ákimshilik quqyq buzýshylyq tirkelmegen, — delingen habarlamada.
Polıtsııa qyzmetkerleriniń aıtýynsha, mundaı oń kórsetkishter turǵyndardyń aýyzbirshiliginiń, belsendi azamattyq ustanymynyń jáne jergilikti atqarýshy organdar, aqsaqaldar keńesi men polıtsııanyń birlesken profılaktıkalyq jumysynyń nátıjesi sanalady.
Qazirgi tańda oblys boıynsha 40 eldi meken alkogol ónimderin tutynýdan bas tartý bastamasyn qoldap otyr. Mundaı aýyldarda turmystyq janjaldar men quqyq buzýshylyqtar azaıyp, qoǵamdyq tártip pen qaýipsizdik deńgeıi aıtarlyqtaı jaqsarǵan.
Polıtsııa turǵyndardy ózara syılastyqty, zańǵa qurmetti jáne qoǵamdyq qaýipsizdikke jaýapkershilikpen qaraý dástúrin saqtaýǵa shaqyrdy.
Budan buryn Abaı oblysynda ishimdikten bas tartqan aýyldar sany 30-ǵa jetkenin jazdyq.
